Thlai thartute leh leisak turte tan indawrna siamsak

Thlai thartute leh leisak
turte tan indawrna siamsak
Thei leh thlai thartuten an hnen atanga lei duhtute nen hmaichhana an indawr theihna turin Aizawlah ruahmanna siam a ni.
IFAD-FOCUS buatsaih Buyer-Seller Meet 2023 hawngtu Agriculture minister C Lalrinsanga chuan kuthnathawktute hmalakna hrang hrang leh thlai thar chhuah man man zawk leh hlawk zawka tihral a nih theihnan hei hi buatsaih a ni tih a sawi a. Sik leh sa inthlak karah kuthnathawktute sum lakluh a lo tam zawkna’n kawng hrang hrangah a department chuan hma a la thin tih sawiin, kawng hrang hrangah hlawhtlinna awm tawh thu leh hmabak la awm te a sawi.
Jhum cultivation leh thlai bulfuk nei loa thlai chin thlakthleng reng chuan hlawkna a pawthniam nia a hriat thu sawiin, tunhnaia IFAD leh FOCUS-in terrace-a lo neih kalphung thar IFS-CADA (Integrated farming System – Compact Area Development Approach) bul an tan chuan beisei sang tak a siam tih a sawi a ni.
IFAD-FOCUS Mizoram project chu district paruk – Champhai, Kolasib, Serchhip, Mamit, Khawzawl leh Saitualah kalpui niin, district tinah Farmer Interest Group (FIG) din a ni a. FIG chu group hrang hrangah thendarh leh niin, group khatah hian mi 15 atanga 30 vel zel an awm. Heng support/ assistance zingah hian thlai leh thei chi hrang hrang FIG-te hi season mila pek thin an ni.
FIG hnuaia thlai leh thei chin tharchhuahte chu a hralhna lamah harsatna an tawh thin avangin, ‘market channel’ mumal zawk bakah a leisaktu nghet an neih theihna’n hma lakpui an ni a. Heng an harsatnate hi hriatpuiin, FOCUS Mizoram chuan ‘Buyer Seller Meet’ hi a buatsaih a ni. A chhim tur hian Aizawla thlai leh thei lama a leisak reng thei tur (vegetables & fruits market players, entrepreneurs, restaurants, marts adt) 50 chuang sawm an ni.