Thli leh rial thawkin chenna in tichhe nual

Inrinni khan Mizoram hmun thenkhatah thli leh rial a thawk leh a, in engemawzat a chhia.
Inrinni tlai dar 5.30 vela Kolasib district-a thli tleh, ruahsur leh rial tla avangin Kolasib leh a chhehvelah in chhia thahnem tak a awm a. Karleh Ningani zan atanga Pathianni zan thlenga UPC (NEI) General Conference vawi 56-na, Kolasib Vengthar UPC biak in bula pandal sak zawh thawkhat tawh chu a tlusawp a, Pathianni chawhma inkhawm ban hnu ah senghawiin, chawhnu atangin a thar sa turin bul tan leh a ni.
Inrinni tlaia nasa taka rial tla chuan Aizawl district-a khaw inhnaih pahnih East Phaileng leh Pehlawn khuaah in 169 a deng chhia.
Thudawn danin East Phailengah hian in 121 a deng chhia a, heng zinga 7 chu luah zui tlak loha chhia a ni. A dang ho hi khua in a bumro zui a nih chuan luah chi loh khawpa chhia a ni thung.
Pathianni khan East Phailenga kohhran awm zawng zawngin biak in kharin khawtlang an hnatlang a, theih ang angin in chhia an thawmtha a, vawiin lamah an chhunzawm ang.
Pehlawnah hian in 48 vel a dengchhia a. Heng zinga 8 chu luah zui tlak lohin a chhia a ni.