Thli leh rial tuarte puihna atan nuai 450

Tunhnaia thli, ruah leh rial thawk avanga in chhiate chhawmdawlna atan Mizoram sawrkar chuan State Disaster Relief Fund (SDRF) atangin cheng nuai 450 a pe chhuak.
March 31 atanga April 2 inkara thli thawk, ruah sur leh rial tla avangin Mizoram hmun hrang hrangah chenna in bik 2646 a chhia a. Heng zinga 335 chu luah zui tlak lohin a chhia a, 2311 chu a chhe vek lo thung.
Chenna in chhiate chhawmdawl thuai an nih theihna’n SDRF nodal department – Disaster Management & Rehabilitation (DMR) chuan hma a la nghal a, DMR minister K Sapdanga hoin April 1 khan official-te an thukhawm.
Chhiatna tuarte chhawmdawlna atan SDRF fund atanga emergency-a rangva leh silpauline lei nghal tura tih a nih angin order siam nghal a ni a. Rangva hi engemawzat a thleng tawh. Hei bakah hian DC tin ten SDRF fund an kawl sa theuh atangin emergency-in a theih ang angin chhiatna tawkte hnenah chhawmdawlna an pechhuak mek.
DM&R department hian SDRF fund hi emergency-in cheng nuai 600 a dil belh a, Finance department chuan April 4 khan nuai 450 a pe chhuak. DC-te hnenah a rang lama pe chhawng tura hma lak nghal niin, April 6 khan DC tin hnenah pek fel a ni.
DC-te hnena sum pek hi respond & relief atan cheng nuai 225 leh recovery & re-construction atan cheng nuai 225, a belkhawmin cheng nuai 450 a ni.
Sum pek chhuah dan
(Rs. in lakhs)
District Pek zat
Aizawl 100
Lunglei 50
Siaha 20
Champhai 40
Kolasib 40
Serchhip 40
Lawngtlai 30
Mamit 30
Saitual 40
Hnahthial 30
Khawzawl 30