Thli leh rial vanga chhiatna tuarte a hun takah puihna pe – Chief minister

Tunhnaia thli leh ruah bakah rial thawk thutah hmun hrang hrangah mipuiin harsatna an tawk chu pawi a tih thu chief minister Lalduhoma chuan a sawi a. A hun takah chhawmdawlna pek an ni tih a sawi.
Zirtawpnia ZPM Serchhip Block political training neih a hmanpuinaah Serchhip bialtu MLA ni bawk Lalduhoma chuan, Zoram dung leh vanga thli leh ruah bakah rial thawk thutah mipuiin harsatna an tawk chu a pawi a tih thu a sawi a. Tunhmain khuarel chhiatna avanga in leh lo leh thildang chhiatna tuartu (victim) ten chhawmdawlna rei tak tak an nghah thin chu ZPM sawrkar hnuaiah chuan a hun takah pek an ni ta a, hei hi kalphung thar leh thil lawmawm tak a ni, tiin a sawi.
Tarlan tawh angin, chhiatna tawkte tanpuina atan Disaster Management & Rehabilitation department chuan rangva bundle 600 a chah a, tunah bundle 100 a thleng tawh. State Disaster Response Fund atana cheng nuai 600 an dil pawh treasury ah inchiah mek a; rangva leh SDRF atanga tanpuina sum hi DC tinah an mamawh dan ang zela sem chhuah leh tur a ni tih department hotute chuan an sawi.
SDRF Fund atanga emergency-a rangva leh silpauline lei nghal tur a tih a nih angin, rang taka order siam a ni a. A vawikhatna atan Aizawl district tan April 4 khan allotment siam a ni. Rangva leh silpauline dang hi thleng thuai tura beisei a ni tih an sawi. SDRF Fund pawh emergency-a dil belh niin, April 4 khan Finance department atangin hmuh nghal a ni a, Zirtawpni khan district zawng zawng DC/ DDMA ah an mamawh zual phuhruk ngei theih turin pek nghal vek theih beisei a ni tih an sawi bawk.