Thli leh rial vanga in chhia 2700+ Rangva leh sum ngaihtuah mek
Tunhnaia thli thawk leh rial tla avanga Mizorama in chhia chu hriat theih chinah 2718 a tling tawh a, heng zinga 55 chu lui zuah tlak loh khawpa chhia a ni. Sawrkar chuan chhiatna tawkte chhawmdawlna atan rangva bakah sumfai a ngaihtuahpui mek.March 30 zinga thli leh ruah thawk bakah a hnu lama thli leh rialin a nuai zui leh tak avang khan chenna in, sawrkar in leh hmun bakah kohhran leh tlawmngai pawl hmunhma engemawzat a chhia a. A district mal ang chuan Kolasib district chu a tuar na ber niin, luah zui tlak loh khawpa in a nuai chhiat erawh Khawzawl district-ah a tam ber thung.
Disaster Management & Rehabilitation department-in District Disaster Management Authority tin atanga report a dawn khawm, April 4 chhun dar 12.00 thlenga chhinchhiahah luah zui leh mai tlak loh khawpa thli, ruah leh rialin a nuai chhiat hi Mizoram pumah in 55 a ni a, heng zinga 37 hi Khawzawl district ami a ni. Chenna in a tam ber a, biak in, school, sawrkar office, NGO building, ran in leh a dangte a ni.
Thawmthat deuh ngai tak, amaherawhchu luah zui leh mai theih tur chi in 273 a chhia a, chenna in a tam ber a, biak in pakhat bakah sawrkar school 3 a tel. Heng chi ah hian Kolasib district chu a tuar na ber an ni.
A then azar chauh chhia, insuanchhuah ngai loa luah zui theih nghal mai ang chi chu in chhiaah hian a tam ber a ni a, in 2390 a ni. Kolasib district ah a tam ber a, Aizawl leh Lawngtlai district ah a tam leh deuh bawk.
Chhiatna tawkte tanpuina atan DM&R department chuan rangva bundle 600 a chah a, tunah bundle 100 a thleng tawh. State Disaster Response Fund atana cheng nuai 600 an dil pawh treasury ah inchiah mek a; rangva leh SDRF atanga tanpuina sum hi DC tinah an mamawh dan ang zela sem chhuah leh tur a ni tih department hotute chuan an sawi.
DM&R minister K Sapdanga chuan tunhnaia thli, ruah leh rial thawka tuartute chu state sawrkarin a theih ang angin a tanpui dawn tih a lo sawi tawh a. Khuarel chhiatna thil a nih avangin chief minister chuan Election Commission of India hnenah harsatna hi a thlen a, model code of conduct huam lai ni mah se, a theih ang angin tanpui ngaite puih an ni tih a sawi.
District Fully Severely Partially Total
damage damage damage
Aizawl 2 72 561 635
Lunglei 1 7 2 10
Siaha – – 2 2
Champhai 7 – 168 175
Kolasib 1 175 655 831
Serchhip 3 9 71 83
Lawngtlai 2 3 366 371
Mamit 2 – 99 101
Saitual – – 117 117
Khawzawl 37 – 113 150
Hnahthial – 7 236 243
Total 55 273 2390 2718