Thli thawkah in 100 chuang chhia Mihring thi leh hliam an awm lo

Pathianni zing lama Mizorama thli thawk thut chuan chhiatna engemawzat a thlen a, in tihchhiat a neih nual bakah power supply a tikhaihlak nasa. Hetihlai hian thli leh ruah thawk thut avanga mihring thi emaw hliam na emaw an awm hriat a ni lo.In chhia hi chenna in bakah biak in, school leh sawrkar hmunhma dang ho – office, supply kudam, sub centre, quarters adt. a ni a; a zat hriatchian theih la ni lo mah se, district hrang hrang atanga report luh danah in 100 chuang a chhia a, hei aia tam fe hi la ni tura ngaih a ni. In chung a hawk sak a tam ber a, a in chawpa len thluk a awm bawk. Luah zui tlak loha chhe vek an awm a, thli leh ruah a thawk zui lo a nih chuan thawmthata luah leh nghal mai theih a awm laiin, chhuahsan ngai lem loa thawmthat hlek ngaia chhe nil nial an awm a ni.
Thingkung tlu leh thildang avanga electric hruipui chat a awm nual a, power supply lama harsatna tawk khaw thenkhat an awm phah. Presbyterian Kohhran hnuaia Zoram pum huap Pavalai Pawl Inkhawmpui neihna tur, East Lungdar-a pandal sak zawh tawh pawh a tlusawp vek a, inkhawmpui hun ruat sa, April 12-14 chhunga an neih hman ngei theih nan tun din leh hman tum a ni.
Khawzawl district-ah Khawzawl chhung leh district huamchhunga khaw 11 velah in chhia report 70 chuang a awm tawh a. Lungtanah Mizoram UPC kohhran biak in chu luah zui rih tlak lohin a chhia.
Champhai khawpui chhungah in 5 vel a chhia a; Pinehill Adventist Academy office, step hulhliap rangva leh quarters chung a hawk bakah an tui dahna zem a lenchhe vek bawk. Vaphai leh Bungzungah chenna in leh school tihchhiat a nei a, Zokhawtharah Wesleyan Methodist Kohhran biak in chung a tichhia a ni.
Serchhip district-a East Lungdar field-ah Presbyterian Pavalai Pawl inkhawmpuilian neihna tura pandal sak zawh tawh chu thli hian a len tlu a, he khuaa chenna in 10 vel a chhe bawk. Pavalai Pawl inkhawmpuina tur pandal sak hi an zo thawkhat tawh a, a chhung chei hna an thawh mek tawh niin, mi 5000 vel lenna tura ruahman a ni. March 31 tlaia East Lungdar VCP kaihhruaia khawtlang hruaitute thukhawm chuan, inkhawmpui hun ngai – April 12 a tan hman tura rela tundin leh hman tum nise, an ti nia thu dawn a ni.
Serchhip district-ah hian Chhiahtlang South ah chenna in 5 leh Mizoram Baptist Kohhran biak in choka a tichhia a, in chung a hawk zingah District Jail quarters a tel. Baktawng leh Chekkawnah in chhia a awm a, Khawlailungah chenna in pakhat chu a liang chawpin a la a, a bula chenna in pahnih a tichhe tel.
Saitual district Tawizo khuaah chenna in 5 leh Bazar shed chung a lenchhia a. Hnahthial district-a New Ngharchhip khuaah in 12, Tarpho ah in 1 luah tlak lohin a chhia. New Ngharchhipa in chhia ah hian Myanmar atanga raltlante chen lailawkna atana sak 8 a tel a, sub centre chung a hawk bakah electric hruipui a chat a ni.
Mamit khawpui chhung hmun thenkhatah pawh in chia a awm nual a. W. Phaileng atanga Mamita kawlphetha lakluhna a chhe nasa nia sawi niin, P&E department-in line chhiatna lai an zawng nghal a. Thingin a hrui a vuak chiar awm nualin, line chhiatna zawng zawng hmuh chhuah vek a la ni lo a, W. Phaileng atanga eng lakluh theih hun tur hriat theih la ni lo mah se, khawthlang lam atangin eng lakluhna buaipui nghalin, line chhia siamthat dan ang zelin a tahtawla eng pek chhuah tum a ni tih sawi a ni.