Thorang ngaihsak zui intiam

Thorang bial atanga tla ta he bialtu MLA hlui Zodintluanga chuan, tling zo ta lo mah se, hnuchhawn mai loa ngaihsak zui zel a tum thu a sawi.
Thorang bial chhunga awm YMA Lungsen Chhimveng Branch chuan Inrinni khan an kum 50 tlin, Golden Jubilee lawm pahin leh YMA Hall sak thar an hawng a. He hun hmanpuitu Zodintluanga chuan Thorang bial chhunga Mizo khaw lian ber, Lungsena YMA Chhimveng Branch-in Golden Jubilee an lawm thei chu Pathian malsawmna a nih rualin, he branch YMA tana kum 50 kalta chhunga sulsutute vang a ni tih a sawi.
He bialtu MLA a nih chhungin amah duhkhawp lohna tam tak an neih a rin rualin, bial tan theihtawp a chhuah ve thin tih erawh an pawmpui a ring tih a sawi a. Bialtu MLA ni tawh rih lo mah se, he bial hi a phatsan ngai dawn lo tiin, “Kum 20 chhung MLA dinhmun min luahtirtu in nih avangin tling zo ta lo mah ila, he bial ka hmangaihna hi a danglam chuang dawn lo Mi thenkhat anga an tlak hnua a thlangtling lo tute ngaihsak zui loh ka tum ve lo. Ka phak tawk leh tlin tawkah he bial tan hian theihtawp ka chhuah zel dawn a ni,” Zodintluanga hian a ti.