Mizote thu leh hlaah Kraws leh Kalvari a lang ve a ni mai lo a, hmun pawimawh a chang. Hmun pawimawh a chang a ni mai lo, hnuhma ropui tak a hnutchhiah tia sawi ngam a ni.
“Kan thu leh hlaah Kalvari rim nam kan nei tha a, hei hian mipui min kaihruai a. Mizote hian Isua tuarna kan tuipui a, hemi kawngah hian thu leh hla hian a thawh hlawk khawp mai,” Mizo Writers Association president R Lallianzuala chuan a ti.
“1940 hma lamah khan hla phuahtute khan Isua tuarna chungchang kha thinlung khawih ngaih maiin an lo phuah a, chu chuan vawiin thlengin mipui hi min hruai a ni,” a ti bawk.
Mizo lengkhawm hlate hi 1920 leh 1960 inkara mi a ni hlawm a, historian B Lalthangliana chuan hengah hian Isua tuarna a lang tih sawiin, “Kan lengkhawm hlaah hian Kalvari leh kraws hi a lang tha a, eng nge a chhan tih lam chu han sawi mai a har mai thei a, mahse Kalvari leh kraws hi lengkhawm hla phuahtute hian an tuipui tih chu a chiang e,” a ti.
“Isua tuarna hi Mizote’n kan tuipui a, biak ina kan hla sak tam ber pawh hi hemi lam hawi hi a ni mai thei. Kan thu leh hlaah pawh hian Isua tuarna lam hi kan nei tha,” a ti bawk.
1989-ah James Dokhuma novel “Gabatha” tih a chhuak a, hei hi Kalvari tlang leh a chhehvel chungchang a ni. Mizo novel, hetiang lam hawiah a hmasa ber nia hriat a ni a, Upa Lalthankima’n sap tawngin a let nghe nghe.
“Gabatha” bakah hian novel dang, a setting pawh Mizote awmna ni lo, Israel ram hi bu dang pawh a awm a, short story pawh a awm nual. Kalvari-a innghat novel, sap tawng atanga lehlin a awm nual a, a hun laia lehkhabu hralh tla ber ber a ni hlawm ang.
Thu leh hla lamah lengkhawm hla tih lohva Kalvari lam hawi a tamna dang chu drama hi a ni awm e. Ram pum huapa lar lem lo, tualchhung kohhran huam chhunga chan, chutiang chu a zat sawi mai theih a ni lo ang.
Thu leh hlain Kraws thu puang
Get real time updates directly on you device, subscribe now.