Thuawih lote in thiahsak

National Highway-54 laihzauh leh siamthat hna thawh mekah Serchhip district-a zangnadawmna la tawh, mahni in la thiat lo te chu sawi lawk tawh angin, Nilaini khan executive magistrate-te kaihhruaina hnuaia endik niin chenna in, in sak lai, green house leh sawrkar ram lak china bungraw chhawpchhuah thenfai a ni.
Serchhip district Competent Authority for Land Acquisition (CALA), bawrhsap David Lalthantluanga hoa January 29-a an rel tawh bawhzuiin Khumtung, Chhingchhip, Chhiahtlang leh Baktawngah Eviction Team an chhuak a. Zangnadawmna sum a vaia la tawh, in la thiat lo mi tlemte chu district administration hian an chungah khawng taka hma la in, dan anga thiatin an senghawi sak a ni.
NH-54 kawngpui laih mekah Serchhip district huamchhunga sawrkarin ram a lakfel tawh, dan anga zangnadawmna – compensation leh rehabilitation and resettlement sum dawng tawh zingah in leh lo thiat duh lo lui hi 2023 July leh August khan magistrate-ten an inah kalchilhin an in thiat tura thupek – eviction notice an pek bakah 2023 November 22 khan CALA hian a hmunah tlawhin an thiah loh chhan a endik a. Eviction drive thawhkhatna hi November 28 khan neih niin, in pakhat thiah a lo ni tawh.
Tun tumah hian chhungkaw engemawzat chuan an in hi an thiah mek avangin thiah sak ngai loa lo thiat chhunzawm tura hriattir an ni a. Thiat ve lo in engemawzat chu sawrkarin ram a lak tawh, Right of Way chinah chhinchhiahin, khawl hmanga thiahsak an ni.