Thuneihna leh Zahawmna

Mipuiin kan aiawha rorel tur ‘aiawh’ kan thlang a, chungte chuan ro an rel a. Ro an rel theihna chhan pawh mipuiin ‘ro rel rawh u’ tia thuneihna kan pek vang a ni. Mipuiin thuneihna an pekte ni ve lo chuan, rorelnaah thu an nei thei lo; thu neih tumin rorelnaah va tel pawh tum eltiang mah se, an tel thei lo, a chhan chu, mipuiin aiawh atana kan thlan an ni ve tlat lo.
Roreltute chuan ro an rel a, dan an siam a, an dan siamte chuan a siamtute ngei ngei pawh a huap nghal vek a; dan chunga leng an awm thei lo.
Hetih lai hian, roreltu (legislator)te hian an zahawmna leh thuneihnate hi anmahni mimal nihna ve reng em maw tia mipui chungtlak nana an hmang emaw, mipui hamthatna tura hna thawk tha lova, mimal emaw, party emaw hamthatna tur ringawta thil an kalpui emaw a nih chuan, chu chu mipui bawk hian an chhuhsak leh mai thin.
Tunhma deuh khan, manto taka MLA te car thar lei chungchangah sawi neuh neuh a awm thin a. Car manto deuh chu MLA-te tizahawmtu ang hiala ngaihna te kha a awm a; khatiang ngaihdan neitu ram hruaitute chuan an zahawmna leh an nihna an hrechiang lo hle tihna a ni.
MLA-te hi car manto leh nalh deuh chhunga an thut avanga zahawm an ni lo a, car manto leh mawi taka an thut theihna chhan mipuite kha an zahawmna chu a ni zawk. Car manto lem lo, mawi fahran lo chhunga an thut pawhin an zahawmna a bo chuang lo a, auto rickshaw chhungah emaw, bike-ah emaw an chuan avang khan an zahawm lo ta sawt e tihna lah a ni hek lo. Khawi hmunah pawh awm se, mipui aiawhtu an nih chhung chu an zahawmna a hniam thei lo.
Kan inthlang a, car manto chhunga chuang thinte kha an tling ta lo a. MLA car aia manto leh nalh zawk chhungah chuang leh thin mah se, a hmaa thuneihna leh zahawmna ang kha an nei tawh lo, Assembly House chhungah lah an thu thei tawh hek lo. Department director-te an thunun pha tawh hek lo. Eng vang nge? Mipuiin an thlang tling tawh miau lova, tunhmaa mipuiin an pek thin thuneihna leh zahawmna kha an nei tawh tlat lo alawm.
Roreltute hian thuneihna an hmang sual a nih chuan, an chungthu rel sak theitu chu mipuite hi an ni. Mipui avanga thunei leh zahawm an nih chu; anmahni vang ni lovin.