Thupek zawm lo te in thiahsak

National Highway 54 kawngpui sial hna thawhin an chenna in a sut chhiat dawn avanga zangnadawmna la tawh zingah, a chenna in thiahna tur thupek ‘eviction notice’ pek tawh, la thiat duh lo leh insenghawi duh lo, Tawipui ‘S’ khuaa S Lalnghinga in chu Competent Authority for Land Acquisition (CALA) Lunglei district aiawh assistant settlement officer leh executive magistrate K Lalhlimpuia hoin Nilaini khan thiah sak a ni.
NH54 kawngpui sial mekin an in a sutchhiat dawn avanga zangnadawmna an lo pek tawh, mahse in la thiat loh leh insaseng duh lote hi vawi tam thuneituten an in thiata insaseng turin an lo hriattir tawh a. Thupek zawm duh lo an la awm avangin heng ho lakah hian thuneituten action an la tan a ni. Zirtawpni hian Thualthu leh Thaizawl khuaa thupek zawm duh lote in thiahsak leh an ni ang.