TISA LEH THLARAU MALSAWMNA

Rev. Dr. Zaichhâwna Hlâwndo

Tun tum chu Zofaten kan tawngkam hman lar tak mai Tisa leh Thlarau malsawmna tih thu hi ziah tulin ka hria a, kan zir chian atan ka rawn chhawp chhuak dawn a ni. He tawngkam hi kan pastor, upa leh rawngbawltuten kan hmang lar a. Mite fuih nan te, thlamuanna thuchah sawi naah te, duhsakna tawngtaina ah te pawh kan sawi leh chham thin tawngkam lâr tak a ni. He kan tawngkam hman thin hi a dik ber em?Tisa thil kan tih ber hi enge? Tisa malsawmna kan tih hi a awm em? Bible hian tisa tih tawngkam hi engtinnge a hman? tihte kan sawi dawn a ni.
Thlarau lama malsawmna tih hi chu sawi tam vak pawh ngaiin ka hre lo. Thlarau malsawmna chu -Pathian nena inzawmna tha, in pawlna nung, a chenchilhna leh kaihhruaina chante hi a ni kan ti thei ang.
Tisa lama malsawmna tih tawngkam kam kan hman a kan sawi tum hi taksa lama malsawmna tih zawk tur a ni hmel. Pathian anpuia mihring siam sawi nan hian thlarau, rilru leh taksa neia siam kan ni tih hi Bible sawi dan tlangpui chu a ni(1Thesolonika 5:23; 1 Korinth 6:19-20; Rome 12:1-2; Hebrai 4:12; Marka 12:30).
Tisa emaw tisa thil tih Bible-in tisa tih tawngkam a hmanna tam tak a awm. Tisa tih thumal hi English chuan flesh tih a ni a, Hebrai tawng chuan basar tih a ni a, Greek tawng chuan sarx tih a ni. Tirhkoh Paula chuan tisa emaw tisa thil a sawiin- mihring suala tlu tawh, Pathian duh loh zawnga nung sawi nan a hmang thin. Tisa tih hi mihring taksa sawina aiin mihring nihna, Pathian thuthlung bawhchhe tawh, a duh zawng aia a duh loh zawng ti thin sawi nan a hmang tlangpui (Rome 7:18; Keimahah (chu chu ka tisaah tihna a ni) thil tha reng a awm lo tih ka hria).
Bible-ah tisa duhzawng leh thlarau chu thil inmil lo, inkalh leh indo a nih thu kan hmu nual a. Galatia 5:16 Chutichuan, hei hi ka ti a ni: Thlarau vah awm rawh u, tichuan tisa chakna chu in zawm dawn lo nia. Chang 17 na ah chuan, Tisa hian Thlarau dona lam a chak thin, Thlarau pawhin tisa dona lam a chak bawk si thin; thil tih in tumte chu in tih theih loh nan chungte chu an inkalh si. Heta chiang taka kan hmuh chu tisa emaw tisa thil chu sual lam sawina a ni. Tirhkoh Petera pawhin chiang takin I Petera 2:11 ah hetiang hian a sawi – Duh takte u, mikhual leh khualzin in nih avangin, thlarau do thintu tisa chaknate bansan turin ka ngen a che u; tiin. Rom 8:5 Tisa dana awmte chuan tisa lam thilte an duh thin; Thlarau dana awmte erawh chuan Thlarau lam thilte an duh thin.
A chunga Bible châng kan han tarlan atang hian kan tawngkam hman thin thlarau leh tisa malsawmna kan tih thin hi a dik lo a ni tih a chiang khawp mai. Taksa leh Thlarau malsawmna tih zawk tur a nih hmel. Tisa thilah kan buai lutuk a, kan tihte pawh hi taksa thilah kan buai lutuk a tih zawk tur a ni ang. Taksa thil chu mihringin kan mamawh hrang hrang a lova kan awm theihloh thilte hi an ni. Tisa thil tih Bible-in a sawi chu Galatia 5:19-21 ah chiang takin kan hmu- Tin, tisa thiltihte chu a lang fiah a ni; chung chu heng hi a ni: inngaihna te, bawlhhlawhna te, hurna te, milem biakna te, dawithiamna te, huatna te, inhauna te, thikna te, thinurna te, inkhinna te, awm hranna te, rin hranna te,itsikna te, zu ruihna te, zu hmun hlimna te, tiin.
Kan tawngtainaah te, thu kan sawinaah te Tisa leh Thlarau malsawmna kan dil emaw kan inhlan khan thil inkalh leh thil indo Pathian duh zawng leh duh loh zawng kan dil kawp tihna a ni thei. Kan rilru lamah chuan taksa thil – eizawnna te, in leh lo leh fanau malsawmna kha a ni tih a chiang. Amaherawhchu tisa thil tih tawngkam kan hman thin avang khan malsawmna ni lovin anchhia kan lo dilsak daih tihna a ni thei. Chuvang chuan kan tawngkam hman kan fimkhur a tul hlein ka hria. Thlarau leh tisa lama malsawmna dil lovin thlarau leh taksa lama malsawmna kan indilsak zawk tur a ni ang. Tisa thilah kan buai lutuk kan tih chuan Pathian duh loh zawng tiin kan hun kan hmang tihna a ni daih thei. Chuvang chuan taksa thilah kan buai lutuk a tih zawk tur a ni ang.