Tlabung VC-ten larsap kawm

Tlabung VC-ten larsap kawm
Tlabung Village Council chuan Zirtawpni khan larsap Dr Hari Babu Kambhampati chu a chenna Raj Bhavan-ah an kawm a, an khaw panna kawng sial hna thawh chu hmundang aia a muan avangin a bik taka ngaihpawimawh sak a, hma la turin an ngen.
Tlabung VC chuan an khua leh a chhehvel panna kawng, National Highway 302 sial hna chu a nih dan tur anga thawh ni loin, lung sakhat phah a nih ngai loh avangin nitin deuhthaw zankhuaa tâng lirthei a la awm reng niin an sawi a. Kawng sial hna thawh chu a muang hrim hrim nia sawiin, Mizoram hmundangah kawng sial hna thawh tur zaa 70-90 vel zawh a nih fur laiin NH 302 erawh thawh tur zaa 17 vel chiah zawh a la ni tih an hrilh.
Hei bakah hian mihring hmasawn leh hmasawn loh tehna pawimawh zual, thil chi hrang hranga hnufualte dawmkanna tur Pradhan Mantri Jan Vikas Karyakram chu an khua leh a chhehvelten an chhawr phak lo tih larsap hi hrilhin, dawmkan ngaite chawikanna tura duan a nih ang taka he scheme-in an khua leh a chhehvel a tuam theihna’n hma laksak turin an ngen. An khua leh a chhehvel chu hriselna, zirna leh infiamnaah ngaihsak leh ngaihpawimawh ngaia an inhriat thu an sawi bawk.
Larsap chuan Tlabung khawtlang hruaitute thil thlen chu pawimawh a tih thu leh, a tul anga enzui ngei a tum thu a lo hrilh a. Tlabung chu a khaw hming pawh a lo hriat fo tawh thu sawiin, remchang hmasa berah tlawh ngei a tum thu a sawi a ni.