Tlawng lei dawhkai hawng

Tlawng lei dawhkai hawng
Lengte kai Tlawng lei dawh chu Thawhlehni khan chief minister Lalduhoma’n a hawng.
Tlawng lei hi metre 100-a sei, metre 7.5 a zau, a sir tawna mihring kalna tur metre 1.5-a zau footpath nei, metric ton 385 zo tura duan a ni a. Sawrkar laipui Ministry of Road Transport & Highways sum vaibelchhe 43.83 hmanga dawh niin, a hmingah “Faith Bridge” vuah a ni.
Chief minister chuan, 2024 December thlatir lamah lei chhuat hi crane hmanga hnuh kai tumnaah a khaina hrui pakhat a chat a, an hlawhchham ta a. Hun eng emaw chen an inbuatsaih leh hnuah 2025 April 7-ah hnuhkai an tum leh a. Contractor-ten Kristian puithiamin hlan hmasa se an ti a, Lengpui pastor Rev. Lalchungnunga Hauhnar-in a hlan a, harsatna tawk loin awlsam takin an hnuk kai ta, tia sawiin, a hminga ‘Faith Bridge’ tih pawh a inhmeh viau tih a sawi a ni.
He lei hi thlai leh thei lama hmun tha bakah balu nei tha Mamit district kalpawhna pawimawh, Tripura leh Bangladesh nena inkalpawhna kawng, Mizoram-in airport a neihchhun Lengpui Airport panna, NIT Mizoram campus awmna tur, state pawn atanga chak lakluhna pakhat Mamit – Bairabi pawhtu a nih avangin a pawimawh a, a tangkai tial tial dawn tih a sawi bawk.
Lei pawimawh tak ni mah se, kum tam tak chhung Bailey Bridge dawhkai niin, Bailey bridge hi an load lak theih a hniam a, tlan phal chin siam a ngai thin tih chief minister hian a sawi a. Lengtekai lei pawh hi tum thum – 2006, 2014 leh 2015 ah a chim tih a sawi. Lei chak tawk tak dawhkai a ni ta a, load restriction avanga unload ngai thin ang chi chu a awm tawh lo tura ngaih a ni tih a sawi a ni.
“Lei dawh chim hi he sawrkarah hian awm lo se kan duh a, hnathawk tha lo an awm a nih chuan sawrkarin a dim dawn lo.A hun taka tha taka hna thawk zo thin sawrkar nih kan tum a ni,” Lalduhoma hian a ti.