Tottenham mualah Arsenal an chak

Pathianni zan khan London derby khelh a ni a, inkhel hmuhnawm takah Arsenal chuan an lenluhna mualah hnehna an chang a, si khat faiin Tottenham Hotspurs an hneh. Pathianni zana inkhel dangah Newcastle United chuan mualneitu Wolves lehthalin hnehna an chang ve bawk.
London hmar veng club lian Arsenal hi hliamin a tibuai a, an midfielder pawimawh leh an captain Martin Odegaard chu hliam vangin an chhawr thei lova. An defensive midfielder pawimawh Declan Rice chu Brighton lakah red card a hmuh vangin an chhawrn thei lo bawk. An midfielder pawimawh pahnih an chhawr theih loh bakah hian an defender thar Ricardo Calafiori chu hliam vangin an chhawr thei lo. Hliamin a tihbuai nasat lai taka an elpui lian Tottenham Hotspurs hmachhawn hi thil chakawm loh tak a ni. Chuti chunga hnehna an chang ta tho hian inrintawkna sang zawk a pe ngei thung ang.
Tottenham Hotspurs Stadium-ah Spurs leh Gunners te an inhnehtawk viau a, inkhel hmuhnawm tak an lantir. An midfielder pawimawh pahnih chhawr thei lo Arsenal game a mar hlei thei lova, an khingpuite hlauhawm takin an nawr hleithei meuh lo. Tottenham hian na taka an mikhualte nawrin, goal thun theihna hun tha pawh an nei a, Arsenal si nghak David Raya an pal tlang thei lo. Arsenal in goal thun theihna hun tha tak an neih chu Gabriel Martinelli-a’n a pet that tawk loh vangin an chhawr tangkai thei lo ve bawk.
Inkhel hmuhnawm takah hun rei tak chhung goal lut a awm theih loh hnuin hun tawp dawn hnaihah Arsenal an vannei a, goal an thun ta nge nge. Defender khel tha tak Gabriel Magalhães chuan Bukayo Saka corner chhuih tha tak chu minute 64-naah chiang zetin a chhuih goal a, hmahruaina goal a thun. Arsenal in goal an thun hnuin Tottenham in goal thun tumin tan an khawh thar a, na zawkin an khingpuite an nawr. Arsenal lakah hlauhawm siam thin mah se Spurs hian hun tawp thlengin goal an thun thei lo tluan a, an mualah ngei an elpui lian Arsenal hneh lovin an tlawm.
North London-a an elpui lian Tottenham lakah an chak vangin Arsenal hian table-ah hma an sawn a, pahnihnaah an inhlangkai. Arsenal hian season tharah vawi li khel tawhin tlawm an la nei lo. Vawi thum chakin draw vawi khat an nei a, point 10 hmu tawhin an chunga awm Manchester City chu point hnihin an phak lo mek. Arsenal in hma an sawn laiin Tottenham erawh chu an tlahniam ve thung. Spurs hian season tharah bul an tan tha lo via a, vawi khat chiah an la chak. Draw vawi khat an neih tawh bakah tlawm zawkah vawi hnih an tang tawh bawk a, point li hmuin 12-naah an awm mek a ni.
Newcastle an chak let
Pathianni zana inkhel dangah Newcastle United chuan mualneitu Wolves lakah si an phurh hmasak zet hnuin hnehna an chang let a, season tharah tlawm nei lovin an kaltluang zel.
Season thara bul tan tha Newcastle hi Wolves hmachhawn turin Molineux Stadium-ah an leng lut. An len luhna mualah khel tha viau mah se, goal chhuah hmasa zawkah an tang tlat thung. Dinhmun derthawng zawka ding deuh reng Wolves tan hian Mario Lemina chuan minute 36-naah hmahruaina goal a thun. Lemina goal thun hmang hian hun rei tak chhung hma an hruai.
Wolves lakah si an phurh reng hnuin hun tawp dawn hnaihah Magpies an che fuh a, goal hnih an thun. Fabian Schär chuan minute 75-naah goal thunin an si phurh a su a. An si phurh an sut atanga minute nga hnu lekah Harvey Barnes chuan hma an hruai letna goal a thun a. Barnes goal thun hmanga hnehna changin Wolves lakah 2-1 in hnehna an chang a, point thum hlu tak an hmu. Newcastle hian season tharah tlawm an la nei lova, khelh li atanga point 10 hmuin pathumna an luah mek a ni.