Mizoram infiamna huangchhunga inelna hautak zet mai, kawngthui zawha thirsakawr intlansiak Tour de Hmuifang vawi 3-na chu September ni 23 (Inrinni) khan zawh fel a ni.
Aizawl atangin Hmuifang Tlang thleng tlan a ni a, hming pe 64 zingah mipa 57 hmeichhia 5 an tel thei a, state pawn atangin mi 2 an tel bawk.
Category tinah champion thar an awm a ni. Tourism Department leh Mizoram Cycling Association (MiCA) tangkawpin an buatsaih Tour DE Hmuifang hi World Tourism Day 2023 ni 27 September a hman tur denchhen a huaihawt niin he inelna ah hian categoty chi hrang panga a awm a – Junior, Elite, Master leh Road (Open) category bakah a vawikhatnan Hmeichhe category (exhibition) hran buatsaih a ni bawk.
Junior leh Master category te hi Maubuang khawchhungah lutin, Thiak khawchhungah lut chho lehin Hmuifang an thleng a. Open (Road) hi Hmuifang kawngdung pangngaiah an tlan a, Elite hi Maubuang Damdiai atangin Changte-ah an chhuk a, Samlukhaiah lawnin Chamring lam atangin Hmuifang an lut thung.
Junior (kum 18 hnuai lam)-ah Vanlalruata, Tuirial pakhatna a ni.Masters (kum 35 chin chunglam)-ah Peter Zohmingliana, Bungkawn chu pakhatna a ni.
Open (Road Category)-ah Dr. Lalrinmawia, Hunthar pakhatna a ni a, inelna hautak ber Elite category-ah Richard Zorinsanga, Thenzawl Field veng pakhatna a ni bawk.
Kharna leh lawmman semna hun hi Hmuifang Tourist Resort-ah hman a ni a, Dr. Lalrozama, IAS Secretary, Tourism Dept. chu khuallian a ni. V Lalengmawia, Jt. Secretary, Tourism Department chuan a kaihruai a ni.
Tour de Hmuifang-ah hian Tourism Department leh Mizoram Cycling Association chuan Aizawl Municipal Corporation, PM-JAY (Pradhan Mantri Jan Arogya Yojona) leh Ministry of Tourism, GOI, North East Regional Office, Guwahati te a thawhpui bawk a ni.
Tour de Hmuifang 3rd edition 2023 elite champion thar Richard Zorinsanga
Get real time updates directly on you device, subscribe now.
Next Post