Tourism minister intawhkhawmah Zoram tlawh turin minister-in sawm

India hmarchhak bakah khawchhak lam state leh union territory-a Tourism minister-te chu Thawhtanni khan Shillong-ah an thukhawm a. Union minister for Culture & Tourism Gajendra Singh Sekhawat leh Union minister of state for Tourism Suresh Gopi ten hmanpuiin, Mizoram atangin Tourism minister Lalrinpuii a tel.
Mizoram minister chuan hmarchhak state-in tourism-ah hma a sawn theih nan a bik taka ngaihtuah ngai a ni tih sawrkar laipui hotute hnenah hian a thlen a. Hmarchhak khawpuite inkalpawhna tha tak hmanga thlunzawm leh khual hip thei hmunhma tlawh tur neihte tih hmasawn a tul, tiin, sawrkar laipui chu ruahmanna fel tak ngaihtuah sak turin a ngen. Mizorama community based tourism kalpui tum dan tlangpui a sawi a. Thing leh mau, ram leilung hausakna leh mawina bakah hnam ziarang vawnghim chungin, thalaite tana subsidy tha tak tak kengtel Entrepreneurship Development Policy leh Programme ruahman sak turin sawrkar laipui hotute a ngen a ni.
Conference-a tel central minister leh state dang Tourism minister-te chu Mizorama zin tur leh Mizoram mawina leh khualzinte chunga a mi chengte thatna, hnam nunzia leh tihdan hmu ve turin Lalrinpuii hian a sawm a. Indaidanna thiata hmarchhakah tourism hmanga danglamna thlen tum turin a sawm bawk.
Tourism minister conference-ah hian Tourism secretary Dr Lalrozama chuan department hmalakna leh Mizoram tourism dinhmun powerpoint presentation hmanga entirin a sawifiah a ni.