Trade Minister Goyal-a’n US tlawh, sumdawnna tihfel beisei

Trade Minister Goyal-a’n US tlawh, sumdawnna tihfel beisei
Indian Trade Minister Piyush Goyal chuan Thawhtanni hian Washington tlawhin hun rei tak sumdawnna thila ram pahnih inremna tur tihkhawtlai tawh, kar liam taa inbiakna chhunzawm taka hmabak awmte a tihfel theih beisei a ni.
“Ram aiawha feh chhuakte hian ram pahnihten an hlawkpui ve ve theih tura sumdawnnaa inremna tur lo ruahman tawhte hma lam an panpui thei dawn a ni,” tiin Inrinni khan sorkar chuan thu a chhuah.
Thawhlehniah khan Brendan Lynch, Assistant US Trade Representative for South & Central Asia kaihhruai US palaite chu Chief Negotiator Rajesh Agrawal-a kahhruai nen New Delhi-ah an lo inbe tawh.
US President Donald Trump-a’n India-in Russian tuialhthei a lei avanga tariff sang tak laksaka a hrem mek karah US thuneitute nena indawrna hi ‘a tha lam’ a nih thu leh ‘hma lam thui tak thlir’ a nih thu New Delhi chuan a sawi.
Hetih lai hian New Delhi chuan Trump-a sorkarin H1B visa fee a tihsan vak leh Russian tuialhthei a lei titlem tura ngennaah chhanna mumal a la pe lo va. Hei bakah hian Washington-in lo neihna leh ni tin in chhungkhur mamawh thawn tam tura a ngenna pawh a la chhang mumal lo bawk.
Trump-a sorkar hian Zirtawpni khan H1B visa fee chu nasa taka tisangin company-ten pakhatah kum khat chhungin $1,00,000 chawi turin a ti a, hei hi Pathianni atanga hman tan nghal kha a ni a. India chuan IT services industry-in nasa takin a tuar thei dawn tih a sawi ve nghal.
Trump-a hian thla hmasa khan Indian bungrua a lak luhah chhiah 25% chawi belhna tur kalpuiin August 27 atanga hman tan kha a ni a, he hremna nen hian tariff hi 50% a ni ta a. He hmalakna hi Washington-in Ukraine-a indona kal meka Moscow-in a sum hnar ber, a tuialhthei man a hmuh thinte India-in a leisak tam vang a ni.
US aiawhte hian New Delhi-a inbiakna nei tura August 25-29 chhung an tlawh tur chu thulh a lo ni tawh a, India hian US-in lo neihna kaihhnawih leh ni tin inchhungkhur mamawha insumdawn tawnna tura a phutte a tihlawhtling duh bik lo a ni.
India hian US-a bungrua athawn chhuah chu July khan $ tluklehdingawn 8.01 a nih laiin August-ah khan $ tluklehdingawn 6.86-ah a tlahniam tih trade ministry chuan a sawi.
Thil thawn chhuaktute chuan tariff sang lakin a nghawng tak tak hi September atangin a hriat tan dawn niin an la sawi bawk.