Traffic Police-in kumtling lo lirthei khalh man an nei tawh

Kum tling lo ten lirthei khalh lo turin tunhnaiah traffic police chuan hriattirna an tichhuak a, hemi bawhzui hian man an nei tawh a, dan hmanga hrem an nih bakah councelling pek an ni.
Aizawl Traffic Poice hian mipui hriattirna tichhuakin, Aizawl khawpui veng hrang hrang, a bikin veng hmawr leh a chuanhnuai lam deuha traffic police duty awm lohna hmunah naupang kum tlinglo leh driving license neilo, school uniform ha chunga helmet khum loa two wheeler khalh an awm thin tih hriat a ni a. Hei hian thil pawi lian zawk a thlen hmaa tihrem a nih theih nan mipui thlawpna an ngen tih sawiin, hetiang hmu leh hriaten an report theihna tur an ruahman a ni.
The Aizawl Post zawhna chhangin senior SP Traffic Stephen Lalrinawma chuan MLA inthlan kaihhnawihah mi an indaih loh avangin duh anga an bawhzui thei lo chungin, mi pathum man an ni tawh tih a sawi. Kum tlinglo lirthei khalh hi na taka hrem theih ni mah se, dimdawi takin an kalpui a, dan hmanga hremna hniam zawk pe chungin, councelling an neihpui tih a sawi.
Traffic SP sawi danin, kum tling lo lirthei khalh hi Rs. 25000 thleng chawitir leh lung in tan tira hrem theih a ni a; an lirthei khalh chu kum khat chhung license cancel sak theih a ni. Lirthei neituten an lirthei kum tling lo khalh tir lo turin an ngen tih a sawi a ni.
Kumtling lo lirthei khalh chungchangah hian zirna inah ngenna thlen tha an tih thu Trarffic SP hian a sawi a. Lirthei khalh chungchanga awarness campaign an neih thin chuan rah tha a chhuah hle nia an hriat thu sawiin, neih chhoh zel an tum tih a sawi.