Tripura Zohnahthlakten pui

Tripura-a Zohnahthlak – Kaipeng leh Hrangkhol hnam aiawhte chuan Manipur-a Zohnahthlakte puihna atan Central YMA hnenah sumfai an hlan.
Central Young Kaipeng Association (CYKA) leh Mizoram Kaipeng Welfare chuan Manipur tualchhung buai avanga harsatna tawk Zofate tanpuina atan Central YMA kaltlangin cheng nuai khat an hlan.
Kaipeng hnam hruaitute chuan Manipura Zofate tawrhna chu an hriatpui a, pawi an ti a, an theih ang tawka puih zel an tum tih an sawi. ‘Kan unaute chunga Manipur sawrkar hmalak danah kan lungawi lo hle a, rorelna dik an pek theih nan Tripura lamah pawh kan theih angin hma kan lo la zel ang,’ an ti.
Hrangkhol Welfare Society, Zion Halflong chuan Manipur Zohnahthlakte tanpuina atan Rs. 2,10,000 an hlan a. Hemi hma hian Tripura lama Zohnahthlakte Ranglong leh Molsom hnam pawhin tanpuina hi Central YMA kutah an lo hlan tawh a ni.