Trump-a tariff tihsanin ram tam tak sawisel a hlawh

Trump-a tariff tihsanin ram tam tak sawisel a hlawh
Donald Trump-a’n US-a bungraw lut zawng zawnga luh man chhiah (tariff) thar a siuam chu ‘khawvel pum economy tan chhiatna’ a nih thu European Commission chief Ursula von der Leyen-i chuan a sawi.
China telin ram dang tam takin tha an tih lohthu an sawi hlawm a. Beijing phei chu he thil hi a hma atanga nasa taka duh lotu niin a ti a nih chuan ‘a chhan letna na tak’ pek tum a ni.
US president hian April 5 atangin an rama ram dang thil lut reng reng tariff chu 10% talin tihsan vek a ni dawn tih a sawi a. Ram 60 velte tariff chu April 9-ah a tihniam hret ang.
Trump-a hian he thutlukna hi sumdawnna kalphung dik (fair) lo tak chhan letna atana ti a nih thu leh he thutlukna hi ‘a nem thei ang bera siam’ a nih thu a sawi.
Ningani tuka thuchhuah a siamah von der Leyen-i chuan chhiah lak dan thar hian ‘thil a tivingvial’ dawn a, ‘khawvel mipui maktaduai telin a nghawng an tuar dawn’ niin a sawi.
A tuar ber tur chu tuna ram rethei ber ber ni sate an ni dawn tih sawiin, heng ramte hi US-a thil an thawn luhna man sang ber ber an ni sa bawk niin a sawi.
EC chief hian Europe ramte chu a tih dan tur ngaihtuah thuai tura tiin European Union pawhin an indawrna a hlawhchham a nih chuan tariff chu 20% thlenga tihsan ve mai a nih tur thu a sawi bawk.
“Kan zinga pakhat hi i bitum a nih chuan kan zavaiin kan chhang let ang che,” a ti.
Trump-a thawhpui, Italy Prime Minister Giorgia Meloni-i pawhin Washington thutlukna chu ‘dik lo’ a ti a; mahse, ‘sumdawnnaa inbeihna’ a thlen loh nan US nen an indawr zel dawn tih a sawi.
Spanish Pime Minister Pedro Sánchez chuan an ram chu ‘khawvel pum tan a inpe chhunzawm reng’ tih a sawi a. Ireland-ah chuan Taoiseach Micheál Martin-a chuan Trump-a thutlukna chu ‘inchhirawm tak’ a nih thu leh ‘tute tan mah’ chhenfakawm a nih loh thu a sawi.
EU pawn lamah chuan China chu a tuar na ber an ni dawn a, anni hi US president-in a do ber pawh a ni a. Bungrua an thawn luhna man 34%-a tihsan niin a kalpui thil dang nen chhiah an chawi zawng zawng chu 54% vel zetin a sang dawn a ni.
Chinese commerce ministry chuan US chu an tariff thar ‘tihtawp lehnghal’ turin a ti a. China chuan ‘a dikna leh a himna turin thil a ti ve nghal dawn’ niin a sawi bawk.
South Korean president lailawk, Han Duck-soo chuan khawvel puma sumdawnnaa indona chu ‘a tak tak a chang ta’ tih sawiin a sorkar chuan ‘sumdawnnaa harsatna awm mek’ chu pumpelh dan a dap dawn tih a sawi a. Asian khawchhak ram hi an tariff 25%-a tihsan ve a ni.
Japan chuan 24%-a tihsan chu ‘uchuak lutuk’ tia sawiin World Trade Organization thutlukna leh US-Japan inremna bawhchhiatna niin a sawi a. Thailand pawhin 36%-a tariff tihsan chu sawi thatpui leh a tum.
US-in tariff thar a puan hma lawka American thil a lak luhna man titawp vek, Israel-a economic thuneitute chuan 17%-a tihsansak an ni chuan ‘a barakhaih tak zet’ tih an sawi niin tual chhung chanchinbuten an sawi.
White House thuneitute chuan an rama bungraw lutte phurh luh man a tisang hi ram dangin an ram laka a tih ang tho a nih thu an sawi ve thung a. An tih anga ti ve mai an nih thu an sawi.