Trump-a thutlukna hlen turin US sipai inpeih

Trump-a thutlukna hlen turin US sipai inpeih
President Donald Trump-a’n Iran laka thutlukna a siam ang apianga pen chhuak turin US sipai chu an inpeih niin Defense Secretary Pete Hegseth-a’n a sawi a, an ram hawi lam chu a chiang thuai dawn tih a sawi bawk.
Nilainia Senate committee an thutkhawmnaah Hegseth-a hian vantlang hriata thil sawi turah a fimkhur hle a, Pentagon chu Iran kap turin a inbuatsaih leh saih loh pawh a sawi duh lo.
Hetih lai hian Senate member-ten an nawr nasat avanga tawng chhuakin Iran laka chet dan tur an hmuh ang apiang hlen chhuak turin an inpeih tih a sawi a, Tehran chu Zirtawpni atanga Israel nen an indo mek chungchangah Trump-a’n nuclear program-ah inremna siam tura a tihna kawng zawh mai turin a ti bawk.
“Inremna hi an siam ngei a ngai a, President Trump-a thu sawi hian awmzia a nei a, chu chu khawvel pawhin an hria a. Defense department-ah chuan kan hna chu inpeih leh tih tura min tuk ti tura inbuatsaih a ni a, chu chu kan tih mek pawh a ni,” tiin Hegseth-a hian Senate Armed Services Committee thutkhawmah a sawi a ni.
Hegseth-a hian Trump-a sorkarin Iran beih lam a hawi dawn em ni tih zawhna chu, “Ni rei lo te hnuah kan hawi lam tur chu a chiang ang,” a ti.
President Trump-a hian Nilaini khan thuthar lakhawmtuten US-in Iran emaw, an nuclear hmun emaw beih a tum leh tum loh an zawhna chu a chhang tha duh lo va, Iranian-te chuan tiamchin an thleng tawh a, thil sawi nan chuan a tlai tawh nia a ngaih thu a sawi.
“Tun leh kar khat liam ta inkar hi a zau lutuk,” tiin White House tuala thuthar lakhawmtuten an kawmnaah Trump-a hian a sawi a. “Tumahin ka kal zelna tur hi an hre lo,” a ti bawk.
Trump-a hian Iran chu White House-a inbiakpui turin rawtna pawh a pe tih a sawi a, a kimchang erawh a sawi lo va. Iran chu Israel-in a kah mawlh mawlh laiin mahni inveng thei lo, van boruaka beihna danna nei lo niin a sawi bawk.
US rorelna chhung lama thil hre deuhte chuan Trump-a leh a thuihhruaite chuan Israel ruala Iranian nuclear hmunte beih mai an awn tan niin an sawi.
Hetih lai hian Iranian Supreme Leader Ayatollah Ali Khamenei-a chuan a hmaa Trump-a’n intiamkamna awm lova inpe mai tura a tihna chu a hnawl.
Iranian-te chu Israel-in an khawpui, Tehran a kah nasat em avangin insaseng tumin an tlanchhia a, kawngpui pawh a tawt hle a, lirthei a tang nasa hle.
Israel hian an air force-ten Iran-a internal security service hmunpui an kap chhe leh tawh niin an sawi bawk.