Trump-a’n Gaza laka enkawl a tum

Trump-a’n Gaza laka enkawl a tum
President Donald Trump-a chuan Israeli Prime Minister Benjamin Netanyahu-a nen Hamas nena inremna an neih theihna tur thil an sawi dunnaah rawtna neiin United States-in Gaza Strip chu ‘enkawl mai’ a tum tih a sawi.
Trump-a hian a hmain indona avanga an awmna chhe tawh tak chu Palestinian-ten kalsanin Middle East ram thenkhat – Egypt leh Jordan ten la lut se tiin a lo rawt tawh a, hei hi Palestinian leh ram pahnih hian an duh lo hle.
“US hian Gaza Strip hi kan la ang a, hna kan thawk zui ang. Kan nei danw a ni,” tiin Trump-a hian Netanyahu-a nena thuthar lakhawmtute an kawmnaah a sawi.
Trump-a hian United States chuan bomb la puak lo te, a hmun chin fel leh in chim senghawite chu a mawhphurhnaah lain ‘eibara hmasawnna tam tak thlenin chu chuan hna leh mihring tan chenna a siam dawn’ tih a sawi a ni.
Trump-a’n mihring a sawi hi tuna an awmna hmasa lama let leh tawh leh awm mek Palestinian-te hi an ni lo thung.
“A mi ngaite, dam khawchhuah nana beia thi leh hrehawm taka awmte tan din thar leha luah leh hi kan tum a ni lo,” a ti bawk.
Gaza-a cheng mi maktaduai hnih vel chu ‘ram dangah an khawsakna tur leh an changkanna tur dapa an kal zel tur thu’ a sawi a ni.
Netanyahu-a chuan Trump-a hi ‘Israel-in thian a neih zinga ropui ber’ tiin a fak a. US president-in Gaza-a thil kalpui dan tur a ruahman chuan ‘history a thlak dawn’ tih sawiin ‘ngaihventlak thil’ a nih thu a sawi bawk.
Egypt leh Jordan chuan Trump-a’n Gaza-a Palestinian awmte an rama sawn chhuah a tih chu an hnial fithla thak thung.
United Nations-a Palestinian aiawhtu pawhin khawvel ram hruaitute hian Palestinian-te lo sam thin duhthu chu an ‘zahsak’ a tul tih a sawi bawk.
Gazan-te pawhin Trump-a rawtna hi an duh lo va. “Trump-a hian Gaza hi bawlhhlawh tian khawm angin a hmu a, a ni bik lo,” tiin kum 34 mi, chhim lama Rafah khawpuia cheng, Hatem Azzam chuan a ti.
US president hian thla 15 an indo hnua Israel-Hamas inkahhai chawllhkar ruk kal tur chu tha a tih thu a sawi a, thawh dang atan Netanyahu-a chu kal zel turin a beisei tih a sawi bawk.
Netanyahu-a pawhin a hmain inkahhai thawh hnihna kalpui turin a inpeih em tih zawhna chu ‘kan tum mek a ni’ tiin a lo chhang tawh.
Trump-a’n ‘chak tak leh hruaitu nihna chak tak’ hmanga inkahhai kalpui a nih theih nana a beihna a fak a, president kal chhuak ta, Joe Biden-a chu Gaza-a thihna nasa tak a thlen avanga an inbakkaih deuh hnuah a sawisel thung.

“Lehlam chuan kan kara a êng lam chauh an hmu a, kum tam vak lo liam ta chhung khan a êng lam chauh min hmuhsak a, keini tan a harsa em em a. Kan thawhhona a that erawh chuan chance tha tak a awm a ni,” a ti.
Israel chuan White House-a hruaitu pahnih an inbiak tan hma lawk hian inkahhai inremna thawh hnihna tur sawiho turin palai hna thawk mek, Qatar ramah an palaite an tir tih a puang.
Hamas pawhin Thawhlehni khan thawh hnihna tura inbiakna hi tan a nih tawh thu an sawi a, an thupuangtu, Abdel Latif al-Qanou chuan an tum ber chu ‘awmna, chhawmdawlna leh indin thar lehna’ a nih thu a sawi.
Inkahhai thawh khatnaah khan Palestinian hel leh Israel hian an mi hren ve ve an inchhuahsan tawn a. Hamas-in an mi hren 18 chhuahin Israel hian Palestinian lung in tang 600 vel an chhuah ve bawk.
Hamas hian Israel hi October 7, 2023 khan beiin mi 1,200 chuang an thah bakah hren turin Gaza-ah 251 an hruai a, hei vanga indona hi chhuak a ni a. Mi hren hi 76 an la awm niin Israeli sipaite chuan an sawi.
Israeli mi hren chhungte an him taka an chhungte an chhuah vek theih nan lehlam lehlam chu inremna nei turin an duh.
January 19-a inkahhai kalpui tan a nih atang hian Gaza-ah ei tur, tuialhthei, damdawi leh mamawh dang thawn luh niin indona avanga hmar lam chhuahsante pawh an kir leh phalsak an ni.
Hamas-in an beihna Israelin a chhet letnaah hian mi 47,518 vel an thi tawh niin Gaza-a Hamas enkawl health ministry chuan a sawi a, a tam ber hi civil mi an ni.