Trump-a’n sawm mah se Iran-in US biak tum lo

Trump-a’n sawm mah se Iran-in US biak tum lo
US President Donald Trump-a’n hmaichhana inbiak a duh thu a sawi hnuah Iranian Foreign Minister Abbas Araghchi chuan Pathianni hnawlin ‘awmze awm lo’ a tihsak.
Trump-a hian thla hmasa khan Tehran hi nuclear programme chungchangah Washington nen inbiak tha a tih thu a sawi a, an indawrna a fel loh chuan bomb hmanga beihah a vau bawk.
Ningani khan US president chuan Iran nena ‘hmaichhana inbiak’ a duh thu a sawi leh.
Pathianni khan Araghchi chuan ‘UN Charter bawhchhiat hlauh vanga invau chung leh dinna hrang hrang nei chunga hmaichhana inbiak chu awmzia a awm lo’ niin a sawi a ni.
“Palai intirha inbiak chu tha kan ti reng a, mi dang kaltlanga inbe tur chuan kan inpeih reng a ni,” tiin a sawi niin foreign ministry thuchhuah chuan a tar lang.
“Iran chu thil thleng thei leh awm theiah a inbuatsaih reng a, palai leh indawrna nen, a ram himna leh nghehna tur ang zelin thutlukna a siam dawn a ni,” tiin Araghchi chuan a sawi.
Inrinni khan Iranian President Masoud Pezeshkian chuan an ram chu US nen ‘dinhmun inang chunga inbiak’ a remtih reng thu a sawi tawh bawk.
Washington-in inbiak a duh chungchanga zawhna chu Pezeshkian-a chuan, “Inbiak i duh laiin invauna hi eng thil nge ni ngai?” a ti.
US leh khawthlang ram tam takin Tehran hi nuclear ralthuam siamah a puh reng a. Iran chuan phain nuclear an sawngbawl chu civil mite tana hman vek a nih thu a sawi.
Inrinni khan Islamic Revolutionary Guard Corps hotu, Hossein Salami-a chuan an ram chu indo turin ‘a inpeih’ tih a sawi.
“Indo chungchangah hian engmah hlauhthawn kan nei lo. Indo tichhuaktu nih erawh kan duh lo va, indo tur erawh chuan kan inpeih,” tiin a sawi niin IRNA news agency chuan a tar lang.
Kum 2015 khan Iran hi UN Security Council permanent member – United States, France, China, Russia leh United Kingdom bakah Germany te nen nuclear sawngbawl chungchangah an inrem.
He inremna, Joint Comprehensive Plan of Action (JCPOA) tih thin hnuaiah hian Iran hi nuclear programme a neihte ralthuam atana siam lo tura tih a ni.
Kum 2018-a Trump-a hun hmasaah khan US chu inremna atanga inhnukdawkin a hmaa Iran a hrekna a kalpui thar leh.
Kum khat hnuah Iran pawhin inremna atanga kirin nuclear programme a kal natpui thar leh.
Thawhtanni khan supreme leader Ayatollah Ali Khamenei-a adviser Ali Larijani-a chuan Iran hian nuclear ralthuam neih a tum lo va, chutih rual chuan beih a tawh chuan ‘duhthlan tur dang’ a nei dawn bik lo tih a sawi.