US President Joe Biden chuan a thlak tak president hlui Donald Trump thah tumna chu a dem thu White House atanga sawiin American te hnenah US politics chu ‘inthahna mual’ a ni ngai lo tiin a hrilh bawk.
Republican presidential nominee Trump chu Butler, Pennsylvania a rally a neih laiin kah niin a bengah kah thawi niin mi pakhatin nunna chan phahin midang pahnihin hliam natak an tuar phah bawk.
Oval Office atanga thusawina a neihah Biden chuan Americans te chu ‘hnung tawlh hret’ ta tiin ‘He rama political rhetoric chu a sa lutuk tawh’ tiin a sawi bawk a.
“Kan ngaihdan chu eng anga nghet pawh ni se, tharuma a inlarchhuah kan remti tur a ni lo” tiin Joe Biden chuan a sawi bawk a.
Biden chuan Americans te chu political polarisation nasa zual zelah tangrual tura ngenin November inthlanna neih tur chu ‘inenchhinna hun a ni dawn’ tiin a sawi bawk.
Biden chuan tun hnaiah politics kaihhnawiha tharumthawhna a thleng zing tawh ti bawkin, “He kawng hi kan zawh zel a rem lo. Kan history ah he kawng hi kan lo zawh tawh” tia sawiin 6 January riot leh ex-House Speaker Nancy Pelosi pasal beihna te pawh a sawi lang a.
“America chuan kan ngaihdan inang lo te ballot box hmangin kan chingfel thin” tia sawi bawkin, “Silaimu ni lovin, ballot box hmangin” a ti bawk.
-- Advertisement --
Trump an thlak danglam
Donald Trump chuan Inrinni zana a nunna lak tuma beihna a tawh hnua interview a neih hmasakah convention speech atana a thusawi tur chu thlak danglam vekin Joe Biden sawisel aiin ‘unity’ message a thlurbing tak thu a sawi.
“Ningania ka thusawi tur chu a danglam khawp ang” tiin a sawi a. “Kha thil kha thleng lo se chuan speeches turu ber pakhat zinga tel tur a ni,” tiin a sawi a. President Biden policy a selna a nih deuh ber thu a sawi a.
“Mahse, tunah chuan ka thusawi tur ka thlak danglam deuh vek a ngai tawh a ni. Tun hi kan ram lungruala kan siam theih hun a ni a, chu hun remchang chu pek ka ni,” tiin a sawi.
Tu nge Thomas Matthew Crooks
Kum 20-a upa US President hlui Donald Trump kahhlum tumtu Thomas Mathew Crooks khan High school rifle team te zawm a tum a, mahse, silai kah a thiam loh em avangin hnawl a lo ni tawh.
Thomas Matthew Crooks chu law enforcement ten Butler, Pennsylvania-a Trump kahhlum a tum hnuah an kaphlum zui a ni.
Trump thusawina atanga 140 metre a hlaa in chungah lawnin chuta tang chuan AR-15-style semiautomatic rifle a pa silai chu hmangin Trump a kap ta a ni. Silaimu in Trump a beng dinglam chunglam tai thlerin kum 50-a upa kap hlumin midang pahnih a hliam bawk.
Trump a kahna atanga darkar khat vel lek kal Bethel park-a cheng niin Thomas Mathew Crooks chu local shooting club Clairton Sportsmen’s Club member a ni bawk.
High school rifle team a tel tumin a inpe a, mahse hnawl a ni thung a. Target inkahsiak tur 20 feet zetin a hlah tiin zirlai hlui Jameson Murphy chuan a sawi a.
“Rifle team a tel a tum a, mahse, silai kah a thiam lo hle a, team-ah tel pha lovin a ni khatnaah hnawl nghal a ni,” tiin a sawi a.
“Crooks khan silai a kap thiam lo. Kap thiam lo tak a ni” tiin a classmate hlui pakhat chuan a sawi bawk a.
Coach te pawhin Crooks-ah ngaihthatlohna an nei tiin zirlai hlui pakhat chuan a sawi bawk a. “School setting a firearms a awm laiin fiamthu mawi lo leh awm lo zet zet a sawi” tiin a sawi bawk.
Pennsylvania-a an chenna khua bul lawkah entry-level job hna thawk mek niin kum 2022 khan high school atanga graduate tawhin bright tak mahse ‘zawiawi’ tak a ni tiin an sawi a.
Bethel Park High School a school counselor hlui Jim Knapp chuan Crooks chu zawiawi tak, midang zahthiam tak, mahnia awm nuam ti a ni a, mahse, thian te chu a nei tho a ti bawk a. Midangte mamawh chi naupang ang a ni lo tiin Knapp chuan a sawi bawk.