TT hlah lova vawttu tam record a siam

Table Tennis (TT) khel thiam Paul McCreery leh Belfast a Ormeau table tennis club te chuan Guinness World Record an siam a, an record siam hi TT ball hlah lo va a inchhawka TT bat hmanga vaw tam thei record a ni.
Hetiang record hi Ormeau TT club hian 2017 khan an lo siam tawh a, chumi tum chuan mi chi hrang hrang 113 an tel a, mahse, an record hi 2020 khan Brighton lama TT club-in mi 118 hmangin an rawn khum a, Ningani kalta khan Ormeau hian mi 130-in record thar an rawn siam leh ta a ni.
Hetiang record siam hi thil awlsam tak a ni lo ang. Record siam tur hian TT bat hmangin ball an invuak chhawk char char a ngai a, mi pakhatin vawi khat a vuak zawhah a kal sawn ang a, midangin an rawn vaw ve leh nghal zel ang. Ball chu board-ah vawi hnih a sawh hman chuan a bul atanga tih that leh a ngai a, an vuak thelh chuan a bul atanga tih that leh tho a ngai bawk. A lehlamah mipakhat a mal tan a, ani hian mi dang 133 chu ball a inchhawkin a vuak pui ta char char mai a ni.
Paul McCreery hi a lehlamah amaha awmin, lehlamah mi 100 chuang a intlar ve thung a, Paul chuan, “Mi 120 chuangin min khelh rawn a ni ber mai a, a hautakin a hahthlak ve takzet a ni. Tihsual palh a awm leh thin a, vawi 15 vel chu bul kan tan tha lehin ka hria. Hlah miah lova vawi 130 chuang ball vuak dik char char kha hautak ve tak a ni,” a ti.