Tual chhung miten Colombian sipai 57 an hren chhan chhuak

Tual chhung miten Colombian sipai 57 an hren chhan chhuak
Kartawp atanga Colombia tlangrama tual chhung miten sipai 57 an hren chu sipaiten beihpui an thlak hnuah chhanchhuah an ni ta tih Colombian defence minister-in a sawi.
Pedro Sánchez-a hian ‘Operation Justice’ an kalpuiah hian silai an hmet puak lo tih a sawi.
Sipaite hi cocaine thar leh tawlha inhnamhnawih nasa tak, EMC hel pawl chakna hmun, Cauca region-ah hren beh an ni.
Sánchez-a hian sipai hrengtuah hian EMC puhin an ‘ru bo’ niin a sawi a, helho hian tual chhung mite chu a hreng turin an ti niin a sawi.
Colombian sipaite chuan Inrinnia EMC hel nia hriat pakhat an man avanga hetiang hi thleng zui ta niin an sawi a. Tlangram atanga thlawhna hmanga an mi man phurh chhuah tuma an buaipui laiin mi 100 chuangin an hual bet zui ta a ni.
Colombian General Erick Rodríguez-a chuan a tuka sipai unit dang tirhte pawh a hma nia mi aia tam zawkin lo dangin an hreng zui niin a sawi.
Tun hi tual chhung miten venhim hna thawktute an hren vawi khatna a ni lo va; mahse, hetiang zata tam sipai hren hi chu a thleng ngai lo.
A hma lama hetiang thleng tawhah chuan tual chhung mite leh mihring dikna chanvo humhalhtu pawlte indawrin sipaite hi chhuah mai an ni thin.
Tun tumah erawh sipai 57 mantute hian inbiak an duh lo va, hei vang hian sipai pawh tam zawk heng lai hmunah hian tirh an ni.
Ralthuam keng sipai tam tak dah niin mi 20 man an ni tih defence minister chuan a sawi.
Sipaiten an chhut dan chuan heng lai vela cheng 90% chuang mah hi cocaine siam nana hman thin, coca chunga ei zawng an ni a. An vela sipai awm hi an tan hlauhawm theiah an ngai thin a ni.
Heng lai velah hian ralthuam keng pawl, lo neitu leh ram neitute pawisa laksak ching leh dan lova thil lai chhuak leh cocaine tawlh thin an tam hle bawk.