Tualchhungah ruihhlo a tawmim deuhah kan ngai – END minister

Aizawl leh a chhehvel bikah tunhnaiah ruihhlo a tawmim deuh nia a lan thu Excise & Narcotics minister Lalnghinglova Hmar chuan a sawi.
Assembly Session-ah House member-te zawhna chhangin minister chuan, Mizorama ruihhlo dinhmun dik tak sawi a harsa a, ruihhlo dona kawnga tha thawh nasa Central YMA Kumpuan Committee sawi danin ruihhlo man a sang hret a, a vang hret an ti a, a tehna tak tak hriatthiam a harsa tih a sawi.
Aizawlah heroin hawng khat hralhna chu Rs. 20000 vel a nih thin laiin tunah Rs. 25000 a ni a, tictac bur khat Rs. 1500 vel ni thin chu Rs.3000 ah kaiin, ruih nana hman khuh damdawi tui chi pawh Rs.150 ni thin kha Rs.500 a kai chho tawh nia an sawi thu a sawi.
Excise & Narcotics bikin ruihhlo an la man tam dan atanga chhutin, man lo pawh engemawzat a awm tura ngaih sa a ni a. Man tur ala tam hle tih a hriatthiam theih tih Lalnghinglova Hmar hian a sawi.
Manipur buaina avangin a hma zawnga Manipur atanga Tripura lam zawh thin kha Mizoram kaltlanga tawlh a tam nia a lan thu sawiin, tualchhungah erawh ziaawm deuh nia ngaih theih a ni a. Ruihhloin min tibuai nasa tih erawh phat chi a ni loa, tanrual a ngai hle tih a sawi a ni.
Transfer & posting an ti mek a, mi 80 an khawih che tawh tih Excise & Narcotics minister hian a sawi. Hei hi chak lehzuala ruihhlo an do theihna tura tih niin, an department dan (manual) ang thlapa tih a nih thu a sawi a ni.
Department nanual-a a inziah angin, inspector chu district khatah kum 5 aia rei a awm thiang loa, sub-station-ah kum 2 aia rei a awm thei lo. Sub-inspector chu kum 3 thleng awm theih niin, engemaw thil bikah kum 4 tih a ni. ASI leh a hnuailam zawng chu hmun khatah kum 5 aia rei an awm thei loa, engemaw thil bik a nih chuan a nih chhan chiang taka ziakin dah tur tih a ni.
“Minister leh MLA han insawipui duhte pawh a awm a ni maithei. Mahse dan angin transfer ngaite transfer phawt ila, kan insiamrem hnua ngaihtuah that lehah kan dah a ni,” a ti.