Tui lian leh ruah vangin US-ah mi 20 thi tawh

Tui lian leh ruah vangin US-ah mi 20 thi tawh
Kartawp liam taa US khawthlang laili leh chhim lam state eng emaw zata sabereka khuangkaih leh tornado thawka thi chu mi 20 an tling ta.
Naupang leh tar telin, thi zinga a zahve hi Tennessee-a mite an ni a, Missouri-ah mi pathum, Kentucky-ah mi pahnih leh Indiana, Mississippi, Georgia leh Arkansas-ah mi pakhat theuh an thi.
Khaw awm dan uchuak tak avangin Pathianni atang khan luite chu an kuang atangin an luang liam a, National Weather Service chuan ruah hi tlem hret tawh mah se hmun tam tak chu ‘tui lian nasa tak’ tawk thei an ni tih a sawi.
Ruah hian Thawhtanni atang kha chuan Atlantic vaukam chhimchhak lam a pan dawn niin an sawi.
Kentucky-ah mipa naupang kum kaw mi chu an sikul bus a nghahnaah tuiin a la a, a ruang hi darkar hnih hnuah an hmu.
Missouri-ah mi chhanchhuak tura inpe kum 16 mi, Chevy Gall chu mi chhanchhuah a tumnaah chesualin a thi a. “Chevy hi miin tanpui tura an kohna a chhannaah a thi a ni,” tiin tual chhunga Fire Chief Terry Feth chuan a sawi.
Little Rock, Arkansas-ah naupang kum nga mi chu an in thing tluin a delhah a delh hlum bawk.
Georgia-ah mipa naupang leh a pa chu Pathiannia golf an khelhnaah an thi a. An ruang buaipuitute chuan kum 58 mi, Matthew Terrell Collins Sr leh a fapa kum 29 mi, Matthew Terrell Collins Jr te hi golf cart-a an chuang thingin a delh niin an sawi.
Thawhtanni tuk (India-a zan lam) thleng khan mi maktaduai kaw chuang chu tui lian thei laka inralring tura tih an la ni tih NBC News chuan a puang.
Lui tui lian nasa avangin Frankfort, Kentucky-a hmun eng emaw zata chengte chu hmun hima insaseng tura tih an ni.
Thawhtanni khan ruah sur nasa hian vaukam lam a pan tan a, Florida, Georgia leh Carolina state hnihah a sur ve thung tawh.
Masters Tournament khelh mekna, Augusta National Golf Club chuan Thawhtanni tukah khan an hmun an tihruah a ngaih phah.
Kar liam ta khan khaw awm dan dik lo tak hian khawthlang laili a tuam zau hle a. Tornado tam tak thawkin county za tel chu ruah tam tak sur thei laka inralring turin Nilaini atanga tih kha an ni hlawm.
Heng lai bawr hian March thla maiah khan tornado, ram kang leh vaivut thli na tak tuarin mi 40 vel an lo thi tawh bawk.