Tui nu mah se tui pump tho

Fur ruahtui tlak laiin Aizawl tui lakna ber Tlawng lui chu nu phut thin mah se, mipui mamawhna avangin tui hi pump luih thin a ni tho tih PHE minister Prof Lalnilawma chuan a sawi.
PHE minister sawi danin, September 1 khan tui nut lam hi a tehnaah NTU 846 a ni a, ruah a sur tlem deuh avanga a zia chho mai tura an ngaih laiin, September 3 khan NTU 865 a kai a, September 5 zing khan hniam lam panin NTU 169 a ni tawh.
“Tui pump-na khawl siamtu company lam chuan NTU 100 chuang a nih hi chuan khawl a uiawm, tiin, pump loh an duh a. Amaherawhchu, mipui mamawhna avangin pump a ngai thin. Ruah a tlak tlem zel chuan tha taka pump theih kan inbeisei,” a ti.
PHE department chu nitin mipui mamawh zingah pawh mamawhna sang ber pawl a ni tih minister hian a sawi a. Hei vang hian chona leh mawhphurhna a sang bik a, mipui tana service tha ber pek theih chu an rilru ah a lian a, chutihlaiin harsatna an tawk leh thin tih a sawi. Tunhnaiah pawh cyclone-in min nuai avangin an khawl a chhe nasa a, heng harsatna hi an thunun theih piahlam a ni tih a sawi.