Tui putna hmun tlawhkual

Tui putna hmun tlawhkual
Assam Rifles chhuahsan tak Lammual chhehvela tui hna awmna, Hunthar lei tlahniama tui put leh Helen Lowry School Seventh Day Tlang Girls Hostel-a pipe thawmthat ngai chu Ningani khan PHE minister Prof Lalnilawma’n a hmunah a endik.
PHE minister chuan Assam Rifles chhuahsan tak Lammuala tui hna tha tak awm chu mumal taka hma lak loh chuan a bulhnaia in dinglai tan chhiatna a thlen thei tih sawiin, tui khawlkhawmna tur mumal tak siam a, vantlang tana hman tangkai theiha ruahman a tul tih a sawi. Lei tlahniam vanga PHED pipe kal dan siamthat ngai pawh department thawktute nen an enhoa, hmalak dan tur an sawiho a ni.
Hunthar lei tlahniam leh Helen Lowry School-a tui putna hmun a endiknaah hemi avanga harsatna lian zawk a thlen lohnan leh khawtlang himna atan tuiluankawr tha siam ngaihpawimawh hmasak a tul tih minister hian sawiin, “PHE pipe put (leak) kan hria a nih chuan mobile phone atangin ‘Water Leak Reporter’ apps hmangin awlsam takin PHED-ah report a thehluh theih a. Report thehluh atanga hun reiloteah thawktuten pipe leak thawmthat hna an bawhzui nghal zel thin,” a ti. Water Leak Reporter mobile apps chu hmelhriata hmang tangkaitu nih tum turin mipui a chah a ni.