Tui tla awm palha chet lak zui dan tur zirtir

YMA Maubawk Branch chuan Tlawng luiah tui tla an awm palha rang taka chet lak zui dan tur hrang hrang inzirtirin Inrinni khan luiah hian hun an hmang.
YMA Branch hnuaia Disaster Sub-Committee kaihhruaiin Maubawk YMA member 100 chuang an thawkchhuak a. Tui hleuh, inpil rei siak leh tui chhunga thil inzawnsiak neih a ni. An ni hian an member-te hi kangmei chhuak laka inven dan leh thelh dan an lo zirtir tawh bawk.
YMA Maubawk Branch president Vanlalchhuanga chuan inzirtir leh intihsiak an buatsaih chhan chu, Tlawng luiah hian kumtin tui tla zawn ngai an awm thin a. Duh vang reng pawh niloin, vanduai thil a ni a, tui tla hmuh mai an nih loh hian a hnaivai leh neitu chan changa inngai ber veng an chet chhuah a ngai thin a. Chumi atan chuan thalaite an inruahman a, huaisen taka an mihring puite an chhanchhuah chu tih makmawh a ni, tiin, “Vanduaina thleng palh atana kan inruahman lawk a ngai,” a ti.
An venga tui thiamte an upa ve zel a, thangtharten an ai an awh chhoh a ngai a, chutiang tur chuan thalai zawkte an inbuatsaih ve zel a ngai tih a sawi a ni.
Tlawng lui hi mi tam takin hun hlimawm hmanna atana hmangin an kal thin a. Reiek kai lam hi a chhengchhia in, a thuk thut thut a, fimkhur a ngai hle a, lui nuam tak hi vanduaina thlen thei a nih avangin YMA Maubawk Branch chuan helai tlawhtute fimkhur turin an ngen a. Ruihhlo nen phei chuan intihlim lo hram turin an chah a ni.