Tui tla tam lutuk tih tlem dan ngaihtuah kan tum dawn – DM&R minister

Tuia tlahlum kan tam lutuk tih ziaawm na turin sawrkar chuan mipui lam hrilhhriatna liantham zawkin kalpui a tum tih Disaster Management & Rehabilitation minister Lalchamliana chuan a sawi.
Tunhnaia Sairang Zero Point bula Railway lei dawh chim avanga chhanchhuah hna leh ruang senghawi hna thawktute chu Zirtawpni khan DM&R minister ho hian inhmukhawmin an hnathawh dan an thlirlet a. Khuarel chhiatna chu thil thleng thei leh dan rual a nih loh laiin, mihring siamchawp chhiatna thleng thin erawh a tam zawk pumpelh theih thil a ni tih minister hian a sawi. “Lei min avanga harsatna tam zawk hi pumpelh theih a ni. Kan state leilung a nghet loa, chua chhapah lirnghing tamna, Seismic zone 5-a awm ka la ni lehzel a; in sak leh lei laih chungchangah pawh thuneitute khap ngai loin kan fimkhur tlan a ngai. Tuitla an tam ta lutuk hi a zia lo hle a, mipui inzirtirna atan liantham deuhin program huaihawt tum a ni,” a ti.
DM&R-in a mamawh hmanruate a theih anga tih changtlun zel a nih dawn thu leh, hetiang chhiatrupna lo thlen thulha tangkai em em, drone lian chi pawh lei tum a nih thu a sawi.
Rel kawng siam meka vanduaina thlenga chhanchhuah hna thawktute, a hnua ruang senghawi hna thawktute leh ruang thawnchhuah hna thawh dante thlirletin thawktuten hna tha tak an thawk ni ah a ngai tih Home minister ni bawk Lalchamliana hian sawiin, “He hmalakna kalpui dan sawiho leh thlirletna hian chhiatrupna dang a lo thleng thulh a nih pawhin remhriatna leh awmze nei zawka hna thawh dan turah ngaihtuahna fing zawk min pe dawn a ni,” a ti.
He vanduainaah hian chief secretary leh a hnuaia DM&R secretary, Aizawl bawrhsap, SP leh SP Traffic, a chhehvela khawtlang hruaitu VC leh YMA bakah mipui, NDRF, SDRF, DC office hnuai Quick Response Team, BSF leh state police ten hna tha tak an thawh thu leh, nunna pathum chhanchhuah hna hautak leh hlauhawm tak tlin taka thawktu Mizo tlangvalte huaisenna leh themthiamna fakawm a tih thu a sawi bawk.
Chief secretary Dr Renu Sharma chuan he vanduaina thleng an hriat atanga sawrkarin chet a lak dan a sawi a. Chhanchhuah hna thawktu – NDRF, SDRF, QRT, Medical team leh official-te tha taka khawtlang mipuiin an thlawp chu state dangte tana entawn tlak a ni, tiin, a bikin vanduaina thlenna hmuna lo thleng hmasa YMA member-te hnathawh dan chu ropui a tih thu leh chhuanawm a tih thu a sawi a ni.
He hunah hian he vanduainaa chhanchhuah hna thawktu hrang hrangte hnenah an hnathawh that chawimawi thilpek hlan an ni.