Tui tla tihtlem nan hmalak dan tur rel

On Sep 13, 2023 10 0

Tui tla avanga nunna chan an lo tlem a, mipui an him zawkna atan Disaster Management & Rehabilitation department chuan state huapin inrawnkhawmna – Quick Response Team, Aapda Mitra, YMA leh Centre for DM Mizoram University tan a buatsaih a. District hrang hrang atangin aiawh an tel.
A hawnna hmanpuitu DM&R minister Lalchamliana chuan Mizoramah tui tla kan awm fo thin chu pawi a tih thu sawiin, Mizo dana ni sarih chhung bo zawnga mahni nun thapa che chhuak thinte erawh an chhuanawmin, hnam tihmingthatu an ni tih a sawi. Vanduai hrim hrim avanga tui tla an awm rualin, thenkhat chu fimkhur tawk loh vang a ni thin tih sawiin, “Rui chunga tui chen, basa ngam ringawt leh a bikin fur laia lui tui hlauhawm theih zia hriat loh vangte a ni thin a; fimkhur thar a tul a ni,” a ti.
Tui tla an awmin an tlakna bul khaw neitu an hah phah thin dante sawiin, an chungah lawmthu a sawi a. Chutihrualin ruang zawnga theihtawp chhuah ngai tawh lo a, tui tla zawn tur kan awm tawh loh nan theihtawp chhuah tlan a pawimawh tih a sawi a ni.
Seminar hi thawh hniha then a ni a. Thawh khatnaah DM&R deputy director (Trg.) Dr Lalrokima Chenkual chuan Mizorama tui tla thlen tawh dan a sawi a. Thawh hnihnaah DM&R director Benjamin Lalzama kaihhruaiin tui tla chhanchhuah kawnga tawnhriat nei tawh – Central YMA, YMA Sairang Branch, YMA Sairang Dinthar Branch leh YMA Sihhmui Branch atangin thu an sawi a, sawiho zui a ni

# Nitin chhuak chanchinbu thenkhat atanga report lakkhawm atangin kum 2011- 2021 chhung khan tui tla avangin Mizoramah nunna chan 300 chuang awm anga chhinchhiah a ni a, an zingah hian kum 21 atanga 40 inkar an tam ber.
#World Health Organization chuan kumtin tui tla avangin khawvel pumah mi 360000 thi thin niin an chhinchhiah a, chu’ng zinga a zatve chu kum 30 hnuailam an ni.
# India ram bikah chuan National Crime Records Bureau chhinchhiah danin, kum 2021 khan rampuma tui tlak avanga nunna chan 36362 an ni.
# Ministry of Home Affairs-a Disaster Management Division chuan tui tla chu disaster-ah a rin luh hleihtheih loh avangin chhiatna dang thenkhata ex-gratia pek thin kha tui tlaah chuan sawrkar atangin a pek theih rih loh a ni.