Tuialhthei barrel khat $200-a lei inring turin Iran-in vau

Tuialhthei barrel khat $200-a lei inring turin Iran-in vau
Iran chuan a sipaiten Nilainia sumdawng lawngte an kah mek laiin khawvel chu tuialhthei barrel khatah dollar 200-a lei tura a inpeih a ngai tih a sawi a. Hetih lai hian International Energy Agency chuan kum 1970 chho hnua tuialhthei tlakchhamna lian zinga mi tihziaawmna turin dah khawl tam tak tihchhuah a rawt mek.
Chawlhkar hnih dawn kaltaa US leh Israel ten thlawhna hmanga beihpui an thlak atanga indona chhuakah tun thlengin mi 2,000 vel an thi tawh a, a tam zawk chu Iranian leh Lebanon mi an ni a. Inbeihna hi Lebanon-ah a kai tawh a, khawvel energy sumdawnna leh phurhna chu a buai phah mek.
Pentagon-in indona a chhuah atanga beihpui an thlak nasat ber an ti tih an sawi laiin Iran pawhin Nilaini khan Israel leh Middle East-a hmun hrang hrang an kap a, hei hian a la do let thei hle tih a tilang.
Nilaini khan Iran Revolutionary Guards sipaiten Gulf-ah an thupek zawm lo lawng pathum an kap nia sawi.
US President Donald Trump-a chuan an chet mekna hian rei a daih dawn lo tih a sawi tawh a, Axios news website hnenah Iran-ah hian bitum tur a awm tawh lo tih a hrilh a. Telephone-a an kawmnaah, “Engtik hunah pawhin a tawp ka duh chuan a tawp mai ang,” a ti.
Tun kar tir khan tuialhthei man hi a sang hle a, barrel khat $120 vel a ni a, $90 velah a tlahniam leh a, phurhna a buai leh dawn tih thu a awm awm avangin Nilaini khan 4% aia tamin a sang leh a, Wall Street-a main share index erawh a tlahniam thung.
Hemi hma hian Trump-a’n indo tihtawp a tum hnai nia an ngaih avangin stock market-te chu a thang chho leh hman a ni.
Hetih lai hian indona hi a kal zel thung a. Gulf rama lawngchawlh hmun leh khawpuite bakah ⁠Israel-a hmunte chu Iran-in drone leh missile hmangin a kah tih tar lan a ni a. Turkey leh Europe atanga indona tihtawp tura ngenna a awm mek bawk.
Israel sipai thuneitu pakhat chuan Iran-ah kah tur list tam tak an la nei tih sawiin ballistic missile leh nuclear kaihhnawih hmunte pawh a la awm tih a sawi.
Tun thlengin khawvela tuialhthei phurh hmun ngaa thena hmun khat vel kalna tuikawng khar mek, Strait of Hormuz-ah him taka an kal theihna tur chi thil thleng a la awm lo.
Trump-a chuan Nilaini khan lawngte chu Strait kaltlangin an kal tur a ni tih sawi mah se Iran-in he channel-ah hian mine 20 vel a dah a, hei hian dahchah mek hi a tikhauh zual nia sawi a ni.
US sipaite chuan Iranian mipuite chu Iran navy hmun awmna lawngchawlh hmun atanga inthiarfihlim turin an hrilh a, Iranian sipaite hnen atanga vauna an dawng a nih chuan lawngchawlh hmunte hi an bitum hmasak tur a ni dawn tih an hriattir.
Tuialhthei hmangtu ram lian ber berte din, International Energy Agency chuan a man sang tur ven nan khawvel pum huapa dah khawl atanga barrel maktaduai 400 chhuahtir a rawt a, hei hi khawvel chanchina a lian ber a ni a, Washington pawhin rang takin a pawm.
Ram hrang hrangten an dah khawm an pek chhuah theih zat a inag lo va, an tihchhuah zat hi Hormuz Strait kaltlanga phurh chanve chauh a ni dawn bawk.
Iranian thuneitute chuan indona a kal zel avangin hun rei tak chhung eibar a tawrhna siam an tum thu Nilaini khan an sawi.
Iran military command thupuangtu, Ebrahim Zolfaqari-a chuan Washington hnena a thusawiah, “Tuialhthei hi barrel khatah $200 a nih hun atan inbuatsaih rawh u, a man hi kan chhehvel himnaah a innghat a, hei hi in tichhe ta a ni,” a ti.
Tuipuiah Thailand flag tarna bungraw phur lawng a kang a, hei vang hian thawktute chhuahtir an ni a, mi pathum chin hriat loh an awm a, engine room-ah an tang nia rin a ni.
Lawng dang pahnih, Japan flag tar bungraw phur leh Marshall Islands flag tak pawh thil kahna avanga chhia a awm a, indona a chhuah atanga sumdawng lawng kah zat chu 14 an tling ta a ni.