Tuihna humhalh lam inzirtir

State Institute of Rural Development & Panchayati Raj Mizoram buatsaihin Nilaini khan Lunglei district-a khaw 12 tuihna humhalh kawnga hma lak mek pualin Localization Sustainable Development Goals (Water Sufficient Village) chungchang inzirtir a ni.
Training-ah hian khaw 12 atangin khawtlang hruaitu mi 36 an tel a. DPRC Lawngtlai head faculty K Vanlaldika chu resource person niin, tuihna leh leilung humhalh kawnga hmalak dan tur bakah SDGs nihphung leh a dinhmun a sawifiah. Ram leilung leh tuihna bakah leilung hausakna chu a hmang thiam leh a enkawl thiam apiangte chu an changkangin, leilung hausakna pawh an chhawr tangkai thin tih a sawi a ni. Chutiang hrereng chunga mahni khuaah theuh tuihna leh ram leilung hausakna an neih ang ang enkawl thiam a, khawtlang hmasawn nana hmang tangkai thiam turin khawtlang hruaitu chu a chah a ni.
Chief Medical Office Lunglei thawktuten natna inkaichhawn theih loh chungchangah zirtirna pe in, khawtlangin hriselna kawnga hma an sawn theihna tura khawtlang hruaitute mawhphurhna leh an hmalakna tur hrilhhriat pahin, a thlawna inentirna an buatsaih sak nghal a ni.