Tuilian vangin mi 50 chuang thi

Kenya-ah ruahsur nasa avanga tuilian vangin mi 50 chuangin nunna an chan niin Red Cross official-te chuan an sawi a.
Capital Nairobi atanga 60km a hla Mai Mahiu khuaa chengte chu zan an mut laiin tuilian hian a hnawl a ni.
Chhanchhuah hna thawh nghal niin chirh atangin mi tam tak chhanchhuahin an awm tawh chungin nunna chan zat hi an la pung tura ngaih a ni a.
Thla kalta khan Kenya-ah hian tuilian nasa avangin mi 100 chuangin nunna an lo chan tawh bawk a.
Mai Mahiu khua leh a chhehvel chu chirhdiap, thingkung inphawk tuilianin a len te chuan a tichhe hneh hle.
Kum 60-a upa Deden Muiri chuan thawm ring tak a hriat thu sawiin mahse enge a nih a hriatchian hmain tuiin a nghawng a chim hman der tiin a sawi a. Tuilianin a nupui a len vawn vawn lai a hmuh thu a sawi bawk.
Amah pawh thi ngei tura inngai tawhin rilruin a chhungte a mangtha thu sawiin mahse mak tak maiin thingzar a man fuh hlauh a, a betta tlat a, a him phah tiin a sawi a.
A fanu pakhat tui hleuh thiam chuan a tu te pahnih chu a chhanchhuah thu a sawi bawk a.
Kenya Red Cross te chuan chhanchhuah hna thawhpui nghalin emergency response manager Anthony Muchiri chuan nunna chan in 50 a pel tawh tiin a sawi a.
“Ka career a ka thil tawna duhawm lo ber a la ni” tia sawiin mihring te chenna in chu tuilian in a hnawl satliah lo a foundation zawng zawng nen a phawk vek tiin a sawi bawk.
Nunna chan ruang naupang 17 hmuh a ni tawh tiin police commancer Stephen Kirui chuan a sawi a. Tuilian thut hi a bul hnaia dam insah vang niin local official te chuan an sawi a.
Mahse Kenyan ministry of water, sanitation and irrigation te chuan tuilian thut chu River Tongi hnuaia railway line siam channel chu hnawmhnawk in a hnawh vang an ti thung a.
Tui luang thei lo te chu railway line luangliamin thlang lamah tuilian nasa tak a siam ta a ni tiin ministry thuchhuah chuan a sawi a. Chuvang chuan Kamuchiri leh Kianugu khua te chuan an tawrhphah ta a ni an ti bawk.
Kianugu khuaa cheng Peter Muhoho chuan a thenawm tam zawkte chu tuilianin a len vek a ti a. “Ka mut lai a ni a, ring mangkhenga ri leh au in a zui nghal a. Tuilianin min chim nghal a, theihtawpin chhanchhuah hna kan thawk a ni” tiin a sawi.
Kenya-ah hian tuilian vangin school te kharin a la awm a, tuilian avanga in leh lo chhuahsan mi 130,000 chuang awm tawhin chung mite chu school hrang hrangah te dahkhawm mek an ni.
Ruahsur nasa chuan thenawm Tanzania leh Burundi te pawh a tibuai hle tawh a. Tanzania-ah chuan ruahsur kaihhnawih vangin kumin January atanga nunna chan 155 an chuang tawh a. Burundi ah pawh mi 100,000 chuang in leh lo chhuahsanin an awm tawh bawk.