Tuipuiral Annual Sports Meet 2024 volleyball champion Dungtlang

Nimin tlai khan Tuipuiral Annual Sports Meet 2024 hmeichhe volleyball final-ah Tuipuiral volleyball thiam khaw pahnih Dungtlang leh Khuangleng intumin, player nei tha zawk Dungtlang chu 25-12, 25-13, 25-19-in an chak a, a vawi-khatna atan Tuipuiral Annual Sports Meet hmeichhe volleyball title an hlawhchhuak.
Zirtawpni final-ah hian Khuangleng hian kawmg engkimah an pha lo a ni ber. Dungtlang hian set hloh nei loin hnehna an chang a, phu takin trophy an hawn.
Mipa volleyball sem-final-ah Farkawn chuan 3-1-in Sazep an hneh a, final luh inchuh game dangah Khuanglengin 3-0-in Bulfekzawl an hneh ve bawk a, Farkawn leh Khuangleng final-ah an intum dawn ta a ni.
Football semi-final pawh nimin khan khelh zawh niin, a thlengtu Sesih leh Lesenzo-in final an lut.
Tuipuiral Annual Sports Meet 2024 hi Sesih khuaa nghah niin, nimin football semi-final match hmasa zawkah Leisenzo chuan 2-1-in Vaphai an hneh
He inkhelah hian Vaphai lamin goal khung hmasa zawkin, minute 27-naah CS Vanlalawmpuia hmangin goal hmahruai an khung a, minute 90 chhungin goal dang a luh belh lo a, he goal hi Vaphai lam hian an chakpui mai dawn nia a lan laiin hun pekbelh minute 93-naah Leisenzo tan Thangnunsiama’n an siphurh a sut a, hun a tawp zui.
Extra time khelh niin, minute 144-naah Thangnunsiama bawkin Leisenzo tan a pet goal leh a, he goal hi Leisenzo final hruai thlengtu goal pawimawh a ni zui ta a ni.
Semi-final hnuhnung zawkah a thlengtu Sesih Blue-in sikhat faiin Samthang an hneh ve bawk.
He inkhel hmuhnawm leh boruak tang takah hian goal a lut har hle a, minute 72-naah Sesih tan Pausuankhama’n a ti goal a, hun tawp thlenga goal dang luh belh loin a thlengtu Sesih chuan final an lut ta a ni.
Vawiin football final match-ah Sesih Blue leh Leisenzo an intum dawn a ni.