Tuna inbiakna chin hi inremna thlentu a ni lo – Chief minister

Mizoram leh Assam sawrkar aiawhin ramri kaihhnawiha an inbiak thinna chu inremna thlentu a la ni loa, a tih khawtlaina mai mai a nihna chen a awm tih chief minister Lalduhoma chuan a sawi.
Ramri kaihhnawiha Aizawla state pahnih aiawh inbiaknaa tel Assam Border Protection & Development minister Atul Bora leh official lokalte chuan Inrinni khan chief minister Lalduhoma chuan a chenna inah an hmu.
Chief minister chuan ramria state pahnih harsatna chu an sawrkar hunlai ngeia chinfel tuma hma lak an duh tih a lo hrilh a. Vawi tam inbe tawh thin mah se, an thutlukna chu ‘status quo’ tih a ni deuh zel a. Hei hi inremna tak tak thlentu niloin, a tihkhawtlaina mai a nihna chen a awm a. Official level-ah an inbe zel anga, a pawimawh zawk chu state pahnih hruaituluten inrem duhna tak tak rilru pua hma an lak tlan a ni, tiin a sawi.
Inrem fel hma chu a khawi lam ve ve mahin ramriah buaina thlen thei harsatna siam loh tha an tih thu Assam minister nen hian an sawi dun a. Atul Bora pawh hian inremna tluantling nei tura inbiak zel tha a tih thu sawiin, inkawmna hun tha a siamsak avangin chief minister hi lawmthu a hrilh a ni.
Chief minister hi adviser to CM (Political) Lalmuanpuia Punte chuan a tawiawm a. Lalmuanpuia Punte leh Atul Bora te hi zirlai pawl (North East Students Organisation) a inhmang dun thin an ni.