TWICE-in No.1 album an nei ve ta

K-pop girl group TWICE album thar ‘With YOU-th’ chu Billboard 200 (albums) chart No.1-ah a debut a, he chart-a an album No.1 kai thei hmasa ber a ni a, an album he chart top 10-a lang thei pangana a ni bawk. Hetihrual hian K-pop girl group dang LE SSERAFIM album thar ‘Easy’ pawh No.8-ah a debut a, he chart-a an album top 10 kai thei pahnihna a ni. Tihian tunkar Billboard 200 chart top 10-ah K-pop girl group album pahnih a debut a, hetiang hi he chart history-ah a vawi khat thlenna a ni.
Billboard 200 chart hi kar khat chunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
TWICE ‘With YOU-th’ hi kar khat chhungin US-ah 95,000 hralhin, chung zinga 90,000 chu album tak tak hralh zat a ni a, streaming atangin 4,500 (official on-demand streams maktaduai 6.33) niin, album-a hla mal hralhna atangin 500 a tling thei bawk.
With YOU-th album-a hla te hi Korean hla deuh ve a no a, sap hla album ni lo he chart-a No.1 kai thei 24-na niin, kuminah chuan a hmasa ber a la ni.
Chart No.1 hlui Morgan Wallen ‘One Thing at a Time’ chu 67,000 hralh lehin No.3 atangin No.2 a kai thar leh a, Ye leh Ty Dolla Sign album intawm ‘Vultures 1’ chu 64,000 hralh lehin, kar hnih a No.1 hnu-ah No.1 atangin No.3-ah a tawlh a, Niah Kahan ‘Stick Season’ chu 57,000 hralh lehin No.4-ah bawk a la awm a, chart No.1 hlui SZA ‘SOS’ chu 47,000 hralh lehin No.5 a la ni a, chart No.1 hlui bawk Drake ‘For All the Dogs’ chu 43,000 hralh lehin No.8 atangin No.6 a kai thar leh a, chart No.1 hlui Taylor Swift ‘1989 (Taylor’s Version)’ chu 41,000 aia tam deuh hralh lehin No.6 atangin No.7 a tawlh ve ta bawk.
LE SSERAFIM album thar ‘Easy’ chu 41,000 hralhin No.8-ah a debut a, he chart-a an album top 10 kai thei pahnihna a ni. An album hmasa ‘Unforgiven’ chu nikum khan chart No.6 a lo kai tawh a ni.
Chart top 10-a lang album dang te chu No.1 lo ni tawh ve ve niin, Taylor Swift ‘Lover’ chu 40,000 hralh lehin No.7 atangin No.9-ah a tawlh a, 21 Savage ‘American Dream’ chu 38,000 hralh lehin No.10-ah bawk a la awm.