UAE-a awmpui intirh dan leh IG live-a nula saruaka inlan MSWC-in chhuizui turin a ti

UAE-a awmpui intirh dan leh IG live-a nula saruaka inlan MSWC-in chhuizui turin a ti
United Arab Emirates-a Mizo hmeichhia hnathawk (housemaid) a kaltirte harsatna tawh thin leh tunhnaia instagram-a Mizo hmeichhe pakhat mipa pakhat nen saruaka an inlan chungchang chu Mizoram State Commission for Women chuan chhuizui turin Mizoram Police a hriattir.
Mizo nula housemaid tura UAE kalten buaina an tawh nasat thu leh an lo tanpui thin dan te sawiin, an mangan thu UAE-a Mizo pakhat chuan a sawi a. Mizoram recruitment agency-te, a bikin Gulf ram – UAE leh hmundanga thawn thinten sawrkar atanga phalna, agency licence nei nia an insawi chu hriatfiah tawk loh a awm thin, tiin, foreign recruitment agent-te hian Ministry of Overseas Indian Affairs hnuaia Protector of Emigrants bakah Mizoram sawrkarin hemi kaihhnawih dan a neihah recruitment agency-te zawm tur leh an tih tur hrang hrang a bituk angin an tih loh thin thu te, Dubai/UAE ah India khua leh tui Indian passport nei, heti ang chia buaina tawk an tam avangin India Consulate chuan housemaid ni tura luh tum chu luh tir lo tawp tura UAE thuneitu (Immigration) chu ram luh tir lo tura an tih ringawt tawh thu te sawiin, hei vang hian airport an thlen rual rualin dan dik loa an luh nghal tan tawh thu te a sawi a ni.
Hetianga buaina tawk an lo chinfel pui, a then thawn haw leh tak leh anmahni chhawrtute atanga la lakchhuah hleihtheih loh pawh 11 vel an awm tih a sawi a. Mizorama thuneituten ngaihven turin a rawn ngen a ni.
He thil hi Mizoram State Commission for Women (MSCW) chuan ngun taka chhui leh vil zui ngai nia a hriat thu sawiin, Mizo hmeichhe tam tak khawvel ram hrang hranga hna thawk (housemaid) a kalte a lo him lo emaw, an kal dan leh thawn chhuah an nih danah thil fel lo a awm emaw a nih chuan pawikhawihna lian tak, human trafficking nia ngaih theih a nih avangin, chhuichiang tur leh hemi kaihhnawih dan bawhchhiatna awm theite chhui turin Mizoram Director General of Police chu a beisei tih a sawi a ni.
Aizawl district deputy commissioner pawh ramdanga hna thawk tura Mizo hmeichhiate thawnchhuak thintu, placement agency-te chu sawrkar laipui duh dan anga thil kalpui an nih leh nih loh zirchiang a, an dinhmun dik tak rang taka chhuizui turin a beisei tih a sawi bawk.
Tunhnaia social media-a sex video darh thar pakhat, a lan dana hmeichhiat mipatna an hmang lai, entu engemawzat awm chungin instagram account hmanga live pawh MSCW hian an beng a thleng tih sawiin, hetiang thil, social media-a hmuh theiha a awm leh thin chu a ngaimawh takzet tih a sawi.
‘Tun tuma hetianga midang hmuh theih tura ualau taka video rawn live-tu(te) hi dan anga na taka hremna pek theih niin a/an lang a. Information Technology Act 2000 pawhin hetiang thil hi a khap tlat a ni. Chuvangin hetiang thil hi a thlen nawn tawh lohna’n leh a ti thinte pawhin an sim theihna’n tunhnaia thil thleng hi uluk taka chhuizui a, pawikhawihtu chu hremna pek a nih ngei theihna’n MSWC chuan hma lak ngei tulin a hria a ni,’ a ti a. DGP chu hma la turin a ti a ni.
MSWC chuan DGP leh Aizawl DC chu he thil hi ni 30 chhungin an bawhzui dan ziaka hriattir turin a ti.