UCL 2024/25 – Aston Villa an chak nghal

September 17, Thawhleh zan khan UEFA Champions League 2024-25 season khelh tan a ni a, hun rei tak hnua UCL hmachhawn phak ve leh nawlh Aston Villa in hnehna an chang nghal. Thawhleh zana inkhel dangah Liverpool leh Bayern Munich ten hnehna an chang bawk. Thawhleh zan UCL result kan hrut kual thuak thuak ang.
Villa an chak chiang
Kum 41 zet hnua Champions League khel phak ve leh nawlh Aston Villa chu Switzerland champion Young Boys hmachhawn turin Stadion Wankdorf, Bern-ah an leng lut a, an len luhna mualah 3-0 ngawtin hnehna an chang. Mimualah 3-0 ngawta chak hi Aston Villa tan bul tanna tha tak a ni.
Villa hian an len luhna mualah bul an tan tha viau a, chawlhlawk hmain goal hnih an thun hman. Inkhel tan atanga minute 27-naah Youri Tielemans chuan hmahruaina goal a thun. Mimualah goal thun hmasa zawk an nih vangin inrintawkna sang zawk nen an inlan a, goal pawh an thun belh leh thuai. Tielemans goal thun hnu hian Jacob Ramsey chuan minute 38-naah an goal hnihna a thun a, an hmahruaina a tizau. Hun rei tak chhung si hnih faia hma an hruai huin hun tawp dawn hnaih minute 86-naah Amadou Onana chuan an goal thumna a thun zui leh a, 3-0 a chakin, point thum an hmu zui ta a ni.
Liverpool an chak
EPL an khelh hnuhnung berah rin loh taka Brentford ngam lo ringawt Liverpool an thochhuak leh nghal a, Italian club lian AC Milan chu Stadio Giuseppe Meazza-ah 3-1 in an hneh.
AC Milan hian an mualah bul an tan tha hle a, inkhel tan atanga minute thumna lekah goal an thun nghal. AC Milan hmahruaina goal hi minute thumnaa Christian Pulisic chu thun a ni. Chelsea atanga Milan zawm Pulisic hi AC Milan tan a chetha chhunzawm zel a, goal a thun tluang zel.
Mimualah goal chhuah hma viau mah se Liverpool an buai lova, goal thumin an khingpuite an chhanglet. Ibrahima Konaté chuan minute 23-naah goal thunin an si phurh a sut a. Virgil van Dijk chuan minute 41-naah an hmahruai letna goal a thun a. Reds goal thumna hi minute 67 a Dominik Szoboszlai thun a ni. Mimualah khingpui hautak AC Milan chu 3-1 ngawtin Liverpool hian an hneh a, Europe a team hlauhawm an nihzia an lantir nawn leh.
Bayern an chak awlsam
German club lian Bayern Munich chuan Allianz Arena a an mikhual Dinamo Zagreb chu 9-2 ngawtin an sawp a, awlsam takin point thum an hmu. Bayern tan hian Harry Kane chuan penalty vawi thum a pet goal a, hattrick a siam.
Bayern tan hian England captain Harry Kane chuan minute 19-naah penalty atangin hmahruaina goal a thun. Kane hian penalty vawi hnih a pet goal zui leh bakah goal pangngai vawi khat a thun bawk. Kane bakah hian Michael Olise leh Raphaël Guerreiro ten goal hnih a thun a. Leroy Sané leh Goretzka ten goal khat ve ve an thun bawk. Dinamo Zagreb goal hnih hi Bruno Petkovic leh Takuya Ogiwara te thun a ni.
UCL khal phung thar
UEFA Champions League 2024-25-ah hian kal phung thar hman a ni a, Group a inthen ang kha a awm tawh lem lo. Team 36 te an inkhel chhuak vek ang a, point hmu sang pariatin direct in last 16 an lut nghal dawn a. Table-ah pakuana atanga 16-an thlengte hi last 16 play-off khel turin seeded an chang ang a. 17-na atanga 24-na thleng ten play-off an khel phak ang a, an ni ho hi unseeded a ni ve thung a. Play-off hi knock-out a khelh tur a ni.