UFC fighter ropui ber Jon Jones a chawl ta

Infiamna hautak leh rothap UFC huanga fighter ropui ber Jon Jones chuan palian kawnghren a kawl mek kalsanin UFC a chawlhsan thu a puang. Jones a chawlh vangin champion lai lawk Tom Aspinal chu palian champion niin kawnghren a kawl zui nghal dawn.
Fighter tha bik Jon Jones hian Light Heavyweight champion kawnghren a kawl mek a kalsan a, kum 2023 khan paliang huangah title fight a hmachhawn. Francis Ngaunnou kawnghren kalsan chu Ciryl Gane nen an inchuh. Fighter hmasawn tak Cityl Gane hi awlsam takin a rek tlawm a, palian champion thar a ni. Gane a hneh hnuin palian huanga fighter ropui ber Stipe Miocic nen an inhmachhawn zui leh a, Jones hian knockout in hnehna a chang zui leh ta mai a, a kawnghren a humhim. Miocic a hneh hnuin palian huanga fighter tha leh hmasawn zet mai Tom Aspinal nen an inhmachhawn zui ngei a rinawm viau a, UFC hmachhawntuten Jones leh Aspinal te inhmachhawn an hmu chak viau bawk. Jones hian a khingpui tur a tichiang thei lo reng a, UFC chairman Dana White nen hlawh chungchangah an inrem hlei thei lo bawk nen palian kawnghren a kawl mek kalsanin, UFC a chawlhsan thu a puang zui ta a. Tlawm nei lovin UFC-ah hun a hmang zo.
“Chiangkuang leh langtlang takin UFC ka chawlhsan thu ka puan puang ta e. Uluk leh ngunthluk taka ngaihtuahna ka sen hnua he thutlukna hi siam fel ta ka ni. UFC-a hun ka hman chhunga ka tawnhriat hrang hrang vangin lawm thu ka sawi e”, Jones chuan a ti a.
“UFC ka luhchilh tan atanga ka tum ka hlen a, ka thlen san theih ber ka thleng hial a ni. UFC chanchina champion naupang ber ka ni thei te, kawnghren humhim tura fighter tha ber ber ka hneh thei te, khawvel hmun hrang hranga min tantue nen hun kan hmanho zawng zawngte kha ka hriatreng tawh tur thil hlu bik an ni. UFC, Dana White, Lorenzo, Hunter, Pathian, ka coach, chhungkua leh fans zawng zawngte chungah ka lâwm e. In mi thlawpna leh rinna hi ka chakna bulpui a ni a. Ka fighters-puite pawh ka theihna min phawrhchhuahsaktu in nih avâng leh, cage chhung leh pawna zahna kan inlantir tawn thin avângin in chungah ka lâwm e”, tiin inthlahna thu a sawi tel bawk.
Kum 2008 a UFC luhchilh tan Jones hi kum 23 mi lek a nih laiin Light Heavyweight Champion a ni a, UFC ah champion thei naupang ber record a siam nghal. Light Heavyweight Champion a nih reng hnuin palian huangah a champion zui leh a, division pahniha champion thei tlemte zingah a tel. Title fight vawi 17 zet a hmachhawn a, title fight hmachhawn tam ber niin title fight-ah tlawm a nei miah lo nghe nghe a, hei hian fighter tha bik a nihzia a tilang chiang hle. Light Heavy-weight-ah vawi title hum zawn rei ber a nih bakah palian huanga kawnghren kawl rei ber a ni tel bawk. UFC-ah hian vawi 20 zet hneh thei an awm lo zawn a, a thiamna ril hmangin a chak leh mai thin. Pumraw lian leh thahrui ngah a nih bakah fighter fing tak mai a ni a, a khingpuite chak lohna lai a hriatsak zung zung thin a, chak zawkah a tang leh mai thin. Hei hi Jon Jones that bikna leh a chungchuanna a ni.
Tunge Jon Jones?
‘UFC fighter ropui ber’ tia hriat reng tawh tur Jon Jones hi kum 1987 khan New York-ah a piang a, a hming tak chu Jonathan Dwight Jones a ni. Jones-a pa Anthur hi Mount Sinai Church of God a Pastor a ni a, Arthur hian a fa pali zinga pakhat Jones hi a hnungzuia Pastor ni a, rawngbawltu ni turin a duh a, Pastor turin chher a tum hle nghe nghe. Mah se Jones hian tuina dang a lo nei ve tlat thung a, tharum hman tamna lam chu a chem kalna a ni zui ta bawk. Fighter beiseiawm tak a ni ta chuan a pa ngei pawh a tiphur zui ta viau nghe nghe a ni.
Jones hian High School a kal laiin Wrestling a khel thin a, football a khel thel ve thin bawk. Amah hi sang thlarh, ruh sei thliang chi a ni a. An football coach chuan ‘Bones’ tiin a ko fiam thin a, chu chu a hmingah pu zuiin Jon Bone Jones tiin a hming hi hriat lar a ni zui ta zel a ni. Wrestling-ah a chetha chho a, national champion a nih zui tak hial vangin school a chawlhsan a, Mixed Martial Arts (MMA) chun April, 2008 khan a luhchilh zui ta a ni.
MMA ah bul a tan tha viau a, thla thum chhungin fight vawi ruk ngawt a hmachhawn a, a chak vek nghe nghe. A chetthat zui em vangin inelna lian leh changtlung zawk Ultimate Fighting Championship (UFC) a luhchilh zui a, August 9, 2008 a neih UFC 87-ah a vawi khat nan a inlan a, UFC-a a khingpui hmasa ber André Gusmão a hneh nghal. Tlawm nei lova a chak chhoh zel hnuin kum 2011 khan vanneihthlak ang reng takin kawnghren chuh theihna hun remchang a nei. Champion lai Maurício “Shogun” Rua hmachhawn tur Rashad Evans chu hliam vangin a inlan thei lo. Jones hian a training pui thin Evans hmunruak luahin Rua hi March 19, 2011 a neih UFC 128-ah a hmachhawn a, Rua hi round thumnaah a knockout ta mai a, Light Heavyweight Champion thar a ni.
Light Heavyweight Champion a nih hnuin a kawnghren chuhpuitute a hneh chho zat zat a, a kawnghren a humhim zel. A chak tluan chhoh viau laiin Drugs test a paltlang zo ta lo tlat mai a, kum 2016 khan kum khat chhung hrem niin a kawnghren an chhuhsak. Hremna tuar zova a kir hnuin dan bawhchhiatna dang a nei a, Jail tan changte a nei a. tum thum ngawt hremna a tuar hial a ni. Hremna tuarin hun engemaw chen fight hmachhawn thei lo mah se hremna tuar zovin a kir a, Octagon chhungah tha zawka inlanin an chak leh mai zel a, hei hi Jone Jones danglamna, a that bikna a chu a ni.
Light Heavyweight huangah title fight vawi 14 ngawt hmachhawn a, a chak vek hnuin kum 2023 khan palian huang a luhchilh tan a, title fight ah hnehna changin palian champion a ni zui leh nghal zat. Palian huanga fighter ropui ber Stipe Miocic a hneh zui leh hnuin fight a hmachhawn zui ta lova, UFC a chawlhsan zui ta a ni.
Jone Jones hian UFC-a hun a hmang chhungin vawi 30 a hmachhawn a, vawi 28 hnehna changin vawi khat tlawm zawkah a tang a, an chak hnuah fight nei lo anga ngaih (no contest) vawi khat a nei bawk. Jones hi vawi khat tlawm anga chhinchhiah a ni tak naa tlawm pangngaia tlawm erawh a ni lo thung. A khingpui pakhat Matt Hamill a sawp lutuk a, dan phal loh anga kut a lo thlak tel vangin chiang taka chak zawk kha chak lo angin puan a ni. A tlawm dan hi heti a nih vangin tlawm nei lo anga sawi zui a ni tho thin. A hneh tak mi 28 zinga mi 11 a knockout a, submission hmangin vawi sarih a chak bawk.