Ui leh Rabies Vaccine

Manipur state-a Churachandpur leh a chheh velah ui â hri (Rabies) a leng mek tih hriat a nih avangin tun hnaiah Mizoram district hrang hranga district magistrate-te chuan ui vulhtute chu an ui vulh lai Rabies Vaccine laktir vek turin thupek an chhuah a. Hei bakah hian Ui khuahkhirhna dan hrang hrang pawh tihchhuah nghal a ni. Ui khuahkirh lohin mihring a seh/tihnat chuan Section 291 of Bharatiya Nyaya Sanhita, 2023 hmanga thlaruk chhung lung in tan emaw Rs. 5,000/- thlenga chawitir theih a nih thu pawh district tinah puanzar mek a ni.
Zonet-in tuk tin zing dar 7-a chanchinthar an puanzarna Zing Daifim-a hospital report-ah hian, ‘ui seh zat’ hi puan tur a awm tuk tin thin a. Ui seh puan tur a awm reng avang hian, ui seh puan tur a awm loh tum pawhin, ‘tukin chu ui seh puan tur a awm lo’ tih chu puan tel a ni ta thin a, ‘ui seh a awm lo’ tih chu news pakhat a tling hial tawh a. Chuti khawp chuan ui seh hi a tam a ni.
Rabies vaccine la tura thupek chhuah a nih rual hian, ui vulhtuten rabies vacine an la ngei em tih hriatchian zui hi thil pawimawh tak a ni a. A chhan chu, ‘tur a ni’ tih leh, ‘tur a ni lo’ tih te hi thuneitute hian an chhuah hnem tawh khawp a, mahse zawm a hlawh lo em em thin. Enge hei hi a chhan ni ang tih han ngaihtuah hian, thupekin zawm a hlawh em tih enfiah/endik zui a nih mumal thin loh vang hi a ni tlangpui awm e.
Tunhma atang tawhin ui vulhtute zawm tur heng thupek— Khawlaiah zalen takin an ui an vahtir tur a ni lo; khawlaiah an chhuahpui dawn a nih chuan hrui (leash) rinawm takin an kai tur a ni; an zun leh ek khawlaiah an hnutchhiah mai mai tur a ni lo; midang tana harsatna siam thei zawngin an vulh tur a ni lo, etc. te hi puanzar a lo ni tawh thin a; mahse, thuneituten dan zawm lote chunga action an lak thawm hi hriat zui tur a awm mang lo. Veng hrang hrang whatsapp group han en ila, ui khuahkhirh loh chungchang, mi kawtkaia ui ek lo awm chungchang, vengchhung chanchinbu semtu naupangten ui an hlauh thu etc. hi hriat tur a awm deuh reng a ni.
Veng tin hian ui census hi neih ni se, rabies vaccine certificate hi local government (LC) hnenah ui vulhtute hian report thlap tura inphut ni se. Ui khuahkhirhna danin zawm a hlawh leh hlawh loh endik fo ni se, dan zawm lote chungah khauh taka action lak ni se, chutianga kan kalpui theih chuan, dan hi mipui lam pawhin kan zah sawtin a rinawm.