Ukraine-a indona a tawp hnai lo – Vance

Ukraine-a indona a tawp hnai lo – Vance
US Vice-President JD Vance chuan Ukraine-a indona chhuak mek chu ‘a tawp hnai mai dawn lo’ niin Fox News-in an kawmnaah a sawi.
Vance-a hian US sorkar tana buaina chu kum thum chhung buaina leh indona chhuak tawh tihtawpna tura Russia leh Ukraine lungawina ve ve tur zawn a ni tih a sawi.
Hetih rual hian Vance-a chuan, “Russia leh Ukraine hian inremna an an kutah a awm a, chu chuan he thil rawng tak hi a titawp ang,” a ti.
Vance-a’n hetiang a sawi hma lawk hian Washington chu Kyiv nen Ukraine-a leilung hausakna thil vâng chi hai chhuahna turah inremna an ziak a, US hian himna kawngah puih ve a intiam.
Vance-a hian an kawmnaah hian Ukraine indonaa Trump-a a inrawlh chu tha ati a. “Ukrainian-te hi run an nih avang hian an thinrim em em a; mahse, sipai leh civil mi sang tel thihna hi kan kaltir reng kher a tul em ni?” a ti.
Trump-a hian tun kar khan Ukraine hian kum 2014 atanga Russia-in a beih tawh, Crimea chu inremna a awmna tura pek mai a remti niin a sawi.
Hetih lai hian Ukrainian President Volodymyr Zelensky chuan Russian-ten peninsula an thunun hi an pawm loh thu leh Ukrainian danpui huam a nih thu a sawi ve thung.
Russian President Vladimir Putin-a chuan tun kar khan May 8 atanga tanin ni thum chhung inkahhai a puang a, hei hi Inopui II-na tawpnaa hnehna an chan lawmna atana tih a ni.
Ukrainian Foreign Minister Andrii Sybiha erawh chuan ni 30 tal inkahhai a tul thu a sawi ve thung.
Indona mualah erawh ram pahnih hi an la inbei reng a. Ningani zan khan Russian drone pakhatin Ukraine chhimchhaka Zaporizhzhia fuhin mi 14 an hliam a, thi an awm lo thung.
Moscow pawhin Ukraine-in drone hmangin Russia awp chin Ukraine chhim lam chu Ningani khan a bei niin a puah a. Mi pasarih thiin mi 20 chuangin hliam an tuar niin Russian thuneituten an sawi.
Kyiv chuan he puhna hi an pha a, anni chuan sipaite chauh an bei thin tih a sawi.