Ukraine beihna avangin Moscow-ah tumhmun khar
Ukraine beihna avangin Moscow-ah tumhmun khar
Ukraine-in drone hmanga Russia a beih nasat karah Moscow-a thlawhna tumhmun liante chu khar lailawk a ni a, thlawhna thlawk leh tum tur 140 vel thulhtir a ni tih thuneituten an sawi.
Inrinni tuk atang khan Ukrainian drone 230 chuang chu Russia-ah thlawh luhtir niin heng zinga 27 chu an khawpui chungah a ni tih Russian defence ministry chuan a sawi.
Russia-a thlawhna thuneitute chuan an khawpuia tumhmun lian pali buai phahin thlawhna 130 chuang chu an thlawh kawng tur tihdanglamsak an ni tih an sawi a, Pathianni zan atang erawh chuan dan pangngaia an thlawh leh tawh thu a sawi.
Hetih lai hian Russia-in Inrinni zana boruak atanga a beihnaah Ukraine-ah mi pathum an thi bawk.
Russia-a Association of Tour Operators (Ator) chuan Pathianni khan darkar 24 chhungin Moscow-a tumhmunte chu vawi 10 an khar hman niin a sawi.
Moscow chhimthlang, Kaluga region pawh a tibuai tel a. Russia-a defence ministry chuan Inrinni tuk atang khan drone 45 an lo dan thu sawiin Kaluga International Airport chu khar lailawk a ni tih an sawi.
Defence ministry chuan drone-te hi Ukrainian nena an inrina bawr, Rostov leh Bryansk region bakah Black Sea chungah an kah thlak nual thu an sawi bawk.
Tun hi Ukrainian drone beihna atanga Russia-a veivahna a buai vawi khatna a ni lo va. May khan Jyiv-in darkar 24 chhunga drone 500 chuang an thlawhtir avangin tumhmun hrang hrangah passenger 60,000 vel an tan thu Russian defence ministry chuan a sawi.
Inbeihna nasa tak a awm mek lai hian Kremlin thupuangtu, Dmitry Peskov-a chuan Russian President Vladimir Putin-a chu Ukraine nen inremna siam a inpeih a; mahse, Moscow ngaih pawimawh ber chu ‘an tum hlen’ a ni tih a sawi.
Moscow-in Ukraine a beih hi kum thum leh a chanve chuang a ni tawh.
Inrinni khan Ukrainian President Volodymyr Zelensky-a pawhin Moscow nena indawrna turin rawtna an nei leh tawh tih a puang bawk.
Russia leh Ukraine hi vawi hnih inbe tawh mah se inkahhai an la puang thei lo va, mi tang leh ruang inthleng erawh an kalpui.
Zelensky-a hian Russia president nena hmaichhana inbiak pawh a inpeih thu a saiw nawn leh a, “Inremna tak tak a awm theih nan hruaitu level-a inbiak hi a tul a ni,” a ti.