Ukraine drone-in Russia tiluhai
Western technology leh finance te hmangin Ukraine chuan Russia ram chhung thuk takh long-range strike a kalpui thei a.
Nato allies ten Ukraine hnenah Western-supply munition te chu Russia beih nana hman remtihna an pe duh lo chungin Ukraine chuan a hmang tho a ni.
Tun hnaiah Ukraine chuan Russia ram chhung thuk tak takah long-range strike kalpuiin drones thahnem tak nen target tam tak a bei a ni Ukraine-in Russia a beihnaah hian air force base, oil leh ammunition depot te leh command centre te pawh a tel a.
Ukrainian firms te chuan one-way attack drone za tel teh meuh siam chhuak tawhin man tlawm bawk si leh tha tho bawk si a siamchhuak chur chur mai a ni.
Ukraine firm tena an tum ber chu Moscow luhaia siam niin investment an hmuhbelh phei chuan indona chu Ukraine chanthatna zawkah an chhuah thei dawnah an ngai a ni.
Francisco Serra-Martins chuan Terminal Autonomy company thla sawm pariat kalta khan dinin an company chuan AQ400 Scythe long-range drone za tel an siamchhuak tawh a, an drone siam te hian 750km an thlawk thei a ni. Hei mai bakah hian thlawk tawi zawk AQ100 Bayonet drone pawh thahnem tak an siam tawh bawk.
Heng drone-te hi thing hmanga siam niin Ukraine-a furniture factory-ah awlsam taka an remkhawm mai a ni hlawm a.
Serra-Martins hi Australian Army Royal Engineer hlui niin Ukrainian thian pakhat nen US finance dawngin firm an din a. Lian tham taka Ukraine-a drone siam chhuak thei company pathum zingah an tel tawh.
An drone siamte chu ‘flying furniture – Ikea ang maia kan remkhawm’ tiin a sawi a. Fuselage siam nan darkar khat vel kan mamawh a, a thluak bur ber – a electronics, motor leh explosive vuah nan darkar chanve vel kan mamawh tiin a sawi.
An company siam Bayonet drone man chu dollar sang chuang deuh awrh a nih laiin Russian air defence missile te, chung drone-te kap thla tua din te chu $1 million man te an ni hlawm thung.
Drone man tlawm bawk si te hi danglamna siamtu a ni mai lo va, Palantir, US data analysis company, Ukraine puitu Western tech company zinga tel chuan artillery strike dik taka a kal theih nan software an siam chhuak bawk a. Chungte hmang chuan Ukraine chuan long-range drone strike kalpui turin hmanrua thar a nei ta a ni.
Palantir a British engineer te chu Ukrainian engineer-te nen thawk hovin an target fuh chat thei turin map tha zawk siamna programme an duang bawk a. Palantir te chuan indonaah an inrawlh lo ti mahse an software hmang turin Ukrainian 1,000 chuang te chu training an pe tawh thung.
Data tam tak hmangin Russia air defence, radar leh electronic jammer te awmna an hre chat chat thei a, chungte chu chart fel tak neiin an siam a, commercial satellite imagery leh signal intelligence hmangin Ukraine chuan Russian te ralthuam awmna te chu an hre chat chat thei bawk.
Ukraine chuan drone hmanga Russia beih nan zan lam a hmang tlangpui a, a drone tirhchhuah te chu a tam zawk kahthlak ni zel thungin 10% vel chauhin an tum ram an thleng thung a ni.
Ukraine chuan Russian electronic jamming system chu a paltlang a ngai a, chumi tur chuan Terminal Authonomy ho siam Scythe drone te chu hmang tangkaiin pilot inhnamhnawih an awm hek lo.
Palantir software chuan drone te kawngzawh tur tha ber thlangin chung drone te chuan Russia air defence a tibuai hle a. Drone te chu tum khat thlawk chhuak chauh tura duan leh man tlawm bawk si an nih avangin a kahthlak nana missile hman man chu a to fe zel zawk bawk a ni.
Prof Justin Bronk, Royal United Services Institute chuan Ukraine long-range drone te chuan Moscow a tiluhai takzet tia sawiin Russia chuan air defence nei ngah mah se engkim a veng seng bik lo a ti bawk a.
Prof Bronk chuan Ukraine long-range strike te chuan Russian mi pangngai teah ‘Russian state chuan engkim a venghim vek thei lo va, derthawngin kan awm tho’ tih a tuh a ni a ti bawk.
Prof Justin Bronk chuan Ukraine-in drone hmanga Russian airbase a beihte chu Russia glide bomb a chhanletna awmze nei ni mek tiin a sawi bawk.
Russian-te chuan Ukraine hnaiha an aircraft base te chu hmun hla zawkah an sawn mek tawh a, chu chu Ukrainian drone te hlawhtlinzia pholanna anga ngaih a ni bawk.
Ukraine chuan western-made long-range weapons te chu hman remtihsak ni se chuan hmasawnna nasa tak an nei dawn an tichungin Kyiv ngenna chu khawthlang ram ten buaina nasa zawk a chhuah an hlauh avangin remtihna an la pe duh lo thung.