Ukraine-in ni 30 vel chauh hun tha nei tawh ti

Ukraine chuan a ram laklet nana counter-offensive a kalpuiah ni 30 vel chauh hun a nei tawh a, favang a intan tawh avangin chet a la zui rei thei tawh dawn lo tiin top-rankin US military officer chuan a sawi.
Gen Mark Milley chuan khawvawt chuan Ukraine tan pawh chetlak a tiharsa lo thei dawn lo a ti a. Counter-offensive chu beisei aia kalpui chak theih lohin a awm a ti bawk a. “Nasa taka inbeihna a la thleng mek reng a ni” tia sawiin, “Ukrainians te chuan hma an sawn bek bek” tiin a sawi bawk.
Gen Milley chuan counter-offensive chu a hlawhchham tia sawi turin a la hma tiin sawi a, Ukraine chuan Russian frontline te sut kuak pawh a nei tawh a ni a ti bawk a.
“Hun a la awm a, ni 30 atanga 45 vel a la awm a. Indona hmachhawn zel turin khawchin awm danin a la hril a, Ukrainians te chak tawk lova ngaih theih a la ni lo” tiin a sawi.
“Indona a la tawp lo va. Tihhlawhtlin an tum chin an la tihlawhtling thei rih lo tih mai chauh a ni” tiin a sawi bawk.
Kyiv in counter-offensive a tih chu an ram Russia-in a chhuhsak leh awp mek te chhuah zalen a ni a, mahse, tun dinhmunah chuan tlemte chauh Russia a la chhuhsak thei a ni.
Ukrainian general te chuan Ukraine chhim lamah Russia invenna pawimawh tak an thiat tawh tiin an sawi bawk a.
“A tir phatah he indona hi a muang dawn a, nunna chan an tam dawn ka ti lawk a, a thleng dik vek a ni” tiin Gen Milley chuan a sawi bawk a. Russia-in a tum ber chu Ukraine rehbeha thunun a ni a, mahse, chu chu a thleng hlawhtling ngai dawn lo va, hei vang tak hian Ukraine chuan chakna a chang zel zawk a ni, tiin a sawi bawk.