Ukraine tanpuina tur bill Senate-in dang

Senate Republicans te chuan Ukraine sum lama tanpuina tur bill chu an dang tlat a, an pawmpui duh lo. $110 billion package-ah hian Ukraine tan $ 61 billion leh Israel tanpuina tur leh Gaza puihna tur pawh a tel a ni.
Republicans te chuan Ukraine hnena puihna pek a nih hmain US immigration leh asylum reforms a awm phawt a ngai an ti a. White House thung chuan Ukraine tanpuina pek vat loh chuan harsatna a tawk dawn a ti thung.
Bill a tlang nana vote 60 mamawhah Senators te chuan 51-49-in an vote a, hei vang hian Ukraine tanpuina tura ruahmanna siam chuan harsatna a tawk ta a, hun rei lo te hnuah Congress chuan thlasik chawlh a nei zui mai dawn bawk.
He bill kalh hian Republican Senator tin ten vote an thlak vek a, anni bakah hian independent Senator Bernie Sanders pawhin duh lo lamah vote-in bill-ah chuan Israel military lama puihna tur billion tel a tel vang a ti.
“Right-wing extremist Netanyahu-an tuna a hmalak mekna puihb nan $ 10 billion pek kan duh tur a ni lo” tiin Sanders chuan Israeli Prime Minister Benjamin Netanyahu-an Gaza strip-a campaign a neih meka civilian sang telin an thih phah tawhna chu a sawi a ni.
Sanders hi Netanyahu sawiseltu langsar a ni a. “Netanyahu sorkar thil tih dan hi a mihrin loh thlak a, international law kalh a ni a, United States chuan hetiang ang mi hi a pui tur a ni lo,” tiin a sawi.
Nilaini khan US President Joe Biden chuan aid bill te chu pawm a nih ngei ngiatin pawm a nih theih nana Republican tena border issue a ngiat an neihte pawh inremna siampui a inhuam thu a sawi.
“He bill hi tihkhawtlai chi a ni lo” tia sawiin “Congress-a Republicans te chuan lawmman hlu ber a beisei Putin pek an remti a ni,” tiin a sawi.
Nilaini kha chuan Biden administration chuan a hmaa lo pawmsa tawh atangin Ukraine tanpuina tur $ 175 million a pe chhuak a. A hmaa package pawmsa tawhah ammunition, missile leh artillery shell bakah national infrastructure pawimawhte humhimna tura tanpuinaa tel a ni tiin US Department of Defense chuan thuchhuah siamin a tarlang.
Tuna tanpuina $110 billion pek tumna erawh duhlohna awm sa niin inhnialna nasa tak a awm sa a. Ukrainian President Volodymyr Zelensky-an lawmakers te nena virtual briefing neih a tum pawh ‘last-minute’ ah thulh a ni a. |hulh a nihna chhan erawh Senate Majority Leader Chuck Schumer chuan a sawi chuang lo.
Ukraine puih tumna hrim hrimah inlungruallohna a awm lem lova sawi niin Republicans te chuan Bill pawm a nih hmain Democrats te chu asylum rules siam tha turin an ngiatin an kar ve thung a ni. Republicans te chuan US southern border-a an ngaihmawh te chinfel a nih theih nana kar nan an hmang ve tlat tia sawi a ni bawk.
Vote lak a nih dawn ruaiah Schumer chuan ngenna siamin an vote chu a pawimawh em em a, Ukraine-in democracy a humhim theih nan tihmakmawh a ni tiin ngenna a siam a. “Vladimir Putin an ngun takin a thlir reng tih hria ula” tiin a sawi.
Senate bill hi a tlang dawn chuan Republican pakua talin an thlawp a ngai a, chu chu sang tak niin Democrats lam chu Republicans te lakah an beidawng hle.
“Ukrainians ten frontline-ah democracy tan an bei mek a ni,” tiin Massachusetts Democrat Elizabeth Warren chuan a sawi a. “He thil hi zalenna chungchang a ni,” a ti bawk.
Senators thenkhatte chuan sawihona la neih zui zel theih a ni an ti a, Congress-ah kar leh lawka holiday a nih mai dawn avangin chu mi hma chuan chinfel a ni hman ang em a chiang lo thung.
He package dodaltu South Carolina senator Lindsey Graham chuan hun mamawh a ni tia sawiin Biden chuan inremna a awm theih nan sawihona a la kalpui a ngai a ni tiin a sawi a.
“Eng nge kan duh an hria a. He bill kan pawm dawn chuan border a kan thil ngiat a hlawhtlin a ngai” a ti bawk.
Senate ah he bill hi pawm pawh ni se house of Representatives ah harsatna a la tawk zui thei tho bawk a. House Speaker Mike Johnson chuan Senate hnenah border security measure awm hma chuan Ukraine tanpuina chu kan pawm dawn lo tih ka hrilh tawh a ti bawk.
February 2022-a Russia-in Ukraine a run atangin Congress chuan Ukraine hnenah military leh economic lama puihna $110 billion a pe tawh a ni.
Tunkar tir lam khan White House budget director Shalanda Young chuan Johnson hnenah lehkha thawnin Congress-in remtihna a pe thei lo a nih chuan kumin kum tawp hmain US chuan Ukraine hnenah ralthuam leh bungrua a pe thei dawn lo a lo ti tawh a.
Ukrainian officials te chuan Russian-te an dodalna tur leh nawr let nan te, Russia-in an ram a awp mek an chhuhsak theih nan US puihna chu an mamawh takzet tiin an sawi bawk a.
Head of Ukraine’s presidential office, Andriy Yermak pawhin US Institute of Peace-te hnenah US tanpuina an hmu lo a nih chuan indonaah an chak loh theihna a sang tia sawiin Russia-in an ram a awp mek te chu chhuah zalen ngaihna a awm lovang, a ti bawk.