Umpire-in Medvedev insum turin a ngen!

Monte Carlo Masters khelh mek Nilainia 6-2 6-4-a Gael Monfils a hneh tumin 2021 US Open title latu Daniil Medvedev chu umpire-in line judge hrawk tuar tuar tawh lo turin a zap dai!
Russian Medvedev hi 6-2 1-2-a hma a hruai laiin a thin tertek a chhuak a, baseline-a call vawihnih awm chu pawm loin official a ankhum a, umpire Mohamed Lahyani chu call enfiahin court-ah a chhuk a, kum 28 mi chu insum tur leh line judge aukhum vak vak tawh lo turin a ngen.
Lahyani chuan, “Daniil khawngaihin aukhum tawh teh suh. Ani (line judge) hi tisual ve thei a ni,” tiin official thlavang a hauhsak.
World number four Medvedev hian Lahyani ngenna chhangletin, “Ka tisual a nih chuan thupha ka chawi mai ang a, engtinnge nangin thupha i chawi ve ang? He game hi dik lo takin ka hloh a, out chung reng siin engtinnge game ka hloh theih? A out a ni mai. In tih dan mai mai hi, Hawk-Eye live pawh hmuh tur awm reng chugin engmah in hmu ve lo maw,” a ti tun tun!
Inkhelh banah Medvedev hian TV camera hmaiah “in or out?” tih a ziak a, tha takin Lahyani nen an inchibai ve leh mai bawk thung.
Nizan mipa singles last 16 result tarlan hman lohah Medvedev hian a chipui Karen Khachanov a hmachhawn zui leh.
Nilaini zan lam men’s second round inkhel thenkhat chu khuain a bumro avangin ‘suspend’ a ni a, chu’ng zingah chuan Indian star Sumit Nagal leh seeded seventh Holger Rune inkhel tur telin, Serbian Miomir Kecmanovic laka ninth seed Grigor Dimitrov-a’n set khata hma a hruai lai pawh sukuk zingah telin, nizana an khelh chhunzawm result tarlan hman a ni lo.
Nilaini second round inkhel hmasa lamah defending champion Andrey Rublev chu Alexei Popyrin lakah straight sets-in a tlawm.
Unseeded Australian Popyrin hian sixth seed Rublev lakah 6-4 6-4 hnehna changin a chipui Alex de Minaur a hmachhawn zui leh.
Kum 24 mi Popyrin chuan nuamti tak leh hahdam takin champion lai a hmachhawn tih inkhelh banah sawiin, tunhnai chhoa khel tha tluang, mahni inringtawk em em leh champion lai ni bawk a hneh thei chu a hlim hle tih a tarlang tel.
Second seed Jannik Sinner pawh kumina clay match a khelh vawikhatnaah last 16 lut zingah telin, Australian Open champion hian American Sebastian Korda chu straight sets (6-1 6-2)-in a hneh a, nizanah unseeded German player Jan-Lennard Struff a hmachhawn zui leh.
Monte Carlo Masters-a vawihnih champion tawh leh kumina 12th seed ni chunga inlan Stefanos Tsitsipas pawhin third round a luhna kawngah straight set hmang bawkin Argentine Tomas Etcheverry a hneh.
Tsitsipas hian Thawhtanni daih tawha Austrian Sebastian Ofner hnehtu German fifth seed Alexander Zverev a hmachhawn leh a; second round inkhel dangah eighth seed Casper Ruud pawhin Chile star Alejandro Tabilo lakah 6-2 6-4 hnehna a chang ve bawk.